የጥበበ ጊዮን ስፔሻላይዝድ ሆስፒታል ሠራተኞች በዘራፊዎች ምክኒያት ሥራ ማቆማቸውን ገለጹ Public Domain  —  ባህር ዳር ከተማ ዙሪያ የሚገኘው ጥበበ ጊዮን ስፔሻላይዝድ ሆስፒታል የሕክምና ባለሞያዎችና ሠራተኞች በአካባቢው ይገኛሉ ባሏቸው ታጣቂ ዘራፊዎች ይደርስብናል ባሉት ዘረፋና ምክኒያት ሥራ ማቆማቸውን ገለጹ። የአሜሪካ ድምፅ ያነጋገራቸውና ለደኅንነታቸው ስለሚሰጉ ስማቸው እንዳይጠቀስ የጠየቁ ሁለት የሕክምና ባለሞያዎች፣ በተለያዩ ጊዜያት የታጠቁ ዘራፊዎች ወደ ሆስፒታሉ ቅጥር ግቢ ዘልቀው በመግባት ሠራተኞቹን በሽጉጥ በማስፈራራት ዘረፋ ማካሄዳቸውን ገልጸው ከሰኞ ኅዳር 9 ቀን 2017 ዓ.ም ጀምሮ መደበኛ ሥራቸውን እንዳቆሙ ተናግረዋል። ለደኅንነታቸው በመስጋት ስማቸውን እንዳንጠቅስና ድምጻቸውን እንድንቀይር የጠየቁን አንድ የሆስፒታሉ የጤና ባለሞያ፣ ከአምስት ወራት ወዲህ በተደጋጋሚ የታጠቁ ድንገተኛ ዘራፊዎች ወደ ሆስፒታሉ ቅጥር ግቢ በመግባት ዝርፊያ እንደሚፈፅሙ ገልጸዋል። ማክሰኞ ኅዳር 3 ቀን 2017 ዓ.ም. የሆስፒታሉን ዳይሬክተር ጨምሮ ሌሎች አምስት ሐኪሞች ግቢው ውስጥ እንደተዘረፉም ተናግረዋል። የሆስፒታሉ ሠራተኞች ለሚመለከተው አካል ጠንካራ የጸጥታ ኃይል እንዲመደብላቸው በተደጋጋሚ ቢጠይቁም መልስ ማግኘት እንዳልቻሉ ገልጸዋል። ለተሻለ ሕክምና ከምስራቅ ጎጃም ዞን ቢቸና ወረዳ ታካሚ በበኩላቸው የሕክምና ባለሞያዎቹ አድማ ላይ በመኾናቸው ምክኒያት ፣ ከሰኞ ጀምሮ እስከ ዛሬ አገልግሎት ባለማግኘት እየተጉላሉ መኾኑን በተመሳሳይ የደኅንነት ስጋት ምክኒያት ስማቸው እንዳይጠቀስ የጠየቁ አንድ ታካሚ ተናግረዋል። የጥበበ ጊዮን አጠቃላይ ሆስፒታል በቀን ወደ 3 ሺሕ ታካሚዎችን እንደሚያስተናግድ የሆስፒታሉ አመራሮች ይገልጻሉ። ከዚህ በተጨማሪ በዩንቨርስቲው በሕክምናና ሳይንስ ኮሌጅ የሚማሩ ተማሪዎችም የተግባር ትምሕርት ይወስዱበታል። በዩንቨርስቲው በሕክምና ሳይንስ ኮሌጅ የአምስተኛ ዓመት ተማሪ መኾኑን የገለጸልንና በደኅንነት ስጋት ምክንያት ስሙ እንዳይጠቀስ ድምጹም እንዲቀየር የጠየቅ አንድ ተማሪ ከሰኞ ጀምሮ የሕክምና ተማሪዎች የተግባር ትምህርት እየወሰዱ እንዳልሆነ ተናግሯል። “ሆስፒታሉ አጥር የለውም። ጠባቂዎቹም ዱላ ይዘው ነው የሚጠብቁት ሲል ቅሬታውን ያቀረበ አንድ በተመሳሳይ ምክንያት ስሙ እንዲጠቀስ ያልፈለገ የሕክምና ባለሞያ መደበኛ የፀጥታ ኃይል ካልተመደበ በቀር ሥራ መሥራት አስቸጋሪ እንደኾነ ጠቁሟል። በባህር ዳር ዩንቨርስቲ በጥበቃ ሥራ የተሰማራና በደኅንነት ስጋት ምክንያት ስሙ እንዳይጠቀስ ድምጹም አየር ላይ እንዳይውል የገለጸልን ግለሰብ፣ የጠበቃ ሥራ የሚሠሩት ያለጦር መሳሪያ በመኾኑ ችግሮች ሲፈጠሩ ምላሽ መስጠት አለመቻላቸውን ገልጿል። በባህር ዳር ዩንቨርስቲ የጸጥታና ደህንነት አገልግሎት ዳይሬክተር ፣ ኢንስፔክተር ሀብታሙ መለሰ የሆስፒታሉ ሠራተኞች በምሽት በታጠቁ ኃይሎች ዘረፋ እንደሚፈፀምባቸው አረጋግጠዋል። አክለውም፣ በአማራ ክልል ባለፈው ዓመት ከታወጀው አስቸኳይ ጊዜ ዐዋጅ ጋራ በተያያዘ ከጸጥታ ኃይሉ ውጭ የጦር መሳሪያ መያዝ የሚከለክል ዐዋጅ በመታወጁ የዩንቨርስቲው ጠባቂዎች የጦር መሳሪያ እንደማይዙ ገልጸዋል። በዚኽም ምክኒያት ወደ ግቢው ታጥቆ የሚመጣውን ማንኛውንም ዘራፊ ለመከላከል አዳጋች እንደሚኾንባቸው ተናግረዋል። ችግሩ ለመፍታትም ከአካባቢው ማኅበረሰብ ጋራ እየተነጋገሩ መኾኑን አስረድተዋል። ሆስፒታሉን በበላይነት የሚያስተዳድረው ባህር ዳር ዩንቨርስቲ ፕሬዝዳንት ዶክተር መንገሻ አየነ ስለ ጉዳዩ ተጠይቀው በሆስፒታሉ ውስጥ ዝርፊያ መከሰቱን አምነው ፣ዛሬ ጸጥታና ደህንነቱን ከሚመራው ተቋምና ከኮሌጅ ከፍተኛ አመራሮች እንዲሁም ከአካባቢው ማኅበረሰብ ጋራ ተወያይተው ችግሮችን ለመፍታት ውሳኔ ላይ መድረሳቸውን ገልፀዋል። የጥበበ ጊዮን አጠቃላይ ሆስፒታል በኢትዮጵያው ጠቅላይ ሚንስትር አብይ አህመድ በፕሬዝዳንት ኢሳያስ አፈወርቂ : በቀድሞው የሱማሊያው ፕሬዝዳንት መሀመድ አብድላሂ መሀመድ " ፋርማጆ "በ2010 ዓ.ም የተመረቀ ትልቅ ሆስፒታል ነው ... የአሜሪካ ድምፅ 13 hr ⟶
የሰባት ዓመት አዳጊ አግተው ገንዘብ የጠየቁ ሦስት ወጣቶች 11 ዓመት እስር ተፈረደባቸው Public Domain  —  በኦሮምያ ክልል ምዕራብ ሸዋ ዞን ወልመራ ወረዳ ሆለታ ከተማ፣ የሰባት ዓመት አዳጊን አግተው በሚሊዮን የሚቆጠር የማስለቀቂያ ቤዛ ጠይቀዋል በሚል ፍርድ ቤት ጥፋተኛ ያላቸው ሦስት ወጣቶች፣ 11 ዓመት ጽኑ እስራት ተፈረደባቸው። የዞኑ ዐቃቤ ሕግና ከፍርደኞቹ የአንደኛው እህት ግለሰቦቹ ጥፋታቸውን በፍርድ ቤት ፊት ማመናቸውን ለአሜሪካ ድምጽ ተናግረዋል። ... የአሜሪካ ድምፅ 13 hr ⟶
ትረምፕ አፍ ለማስያዝ ተከፈለ ከተባለው ገንዘብ ጋር በተያያዘ የተፈረደባቸው ክስ ጉዳይ እጣ ምን ይሆን? Public Domain  —  የቀድሞ ፕሬዝዳንት ዶናልድ ትረምፕ ከ2016ቱ ምርጫ በፊት ሊጎዳቸው የሚችል መረጃ እንዳይወጣ ለማድረግ ከገንዘብ ወጭ ጋር የተያያዙ መረጃዎችን አጭበርብረዋል በሚል ተወንጅለው፤ ባለፈው የግንቦት ወር በተካሄደው የክስ ሂደት ቁጥራቸው 34 በሚደርሱ ከባድ ወንጀሎች ጥፋተኛ ሆነው ተገኝተዋል። የቅጣት ውሳኔያቸውም የምርጫው ሂደት እስኪጠናቀቅ ድረስ እንዲዘገይ ተደርጎ ነበር። አሁን እርሳቸው ተመራጭ ፕሬዚዳንት በመሆናቸው፤ የክስ ጉዳዮቹን በተመለከተ የሚቀጥለው ምን እንደሆን ግልጽ አይደለም። ቲና ትሪን ያደረሰችንን ዘገባ ከተያያዘው ፋይል ይከታተሉ። ... የአሜሪካ ድምፅ 13 hr ⟶
የኢትዮጵያን ብዙኀን መገናኛ ዐዋጅ ማሻሻያ ረቂቅ ዐዋጅ ከፍተኛ ትችት ቀረበበት Public Domain  — በርካታ የሰብአዊ መብት ድርጅቶች፣ የሲቪክ ተቋማትና የጋዜጠኞች ሞያ ማኅበራት የመገናኛ ብዙኅን ዐዋጅ ማሻሻያ ረቂቁን ተቃወሙ። የዴሞክራሲ ጉዳዮች ቋሚ ኮሚቴ በሕዝብ ተወካዮች ምክር ቤት ዛሬ ባዘጋጀው ውይይት ላይ የተገኙ በአብዛኛው ጉዳዩ የሚመለከታቸው ተቋማት ተወካዮች፣ ረቂቁ በነባሩ ዐዋጅ የተደነገጉ የመገናኛ ብዙኅን ነጻነቶችን ወደ ኋላ የሚመልስ መኾኑን ጠቅሰው፣ ተቃውሟቸውን አሰምተዋል።   የኢትዮጵያ መገናኛ ብዙኅን ባለሥልጣን በበኩሉ፣ “ማሻሻያው ነጻነትን የሚገድብ ሳይኾን የሕግ ክፍተቶችን ለመቅረፍ ያለመ ነው" ሲል ትችቱን ተከላክሏል። ... የአሜሪካ ድምፅ 13 hr ⟶
የቀድሞ የትግራይ ተዋጊዎችን ወደ ኅብረተሰቡ የማዋሐድ ሥራ ነገ እንደሚጀምር ተገለጸ Public Domain  — ወደ 75 ሺሕ የሚጠጉ የቀድሞ የትግራይ ተዋጊዎችን ትጥቅ በማስፈታት፣ ወደ ኅብረተሰቡ መልሶ የማዋሐድና የማቋቋም ሥራ ነገ እንደሚጀመር የኢትዮጵያ ብሔራዊ ተሀድሶ ኮሚሽን፣ ዛሬ አስታወቀ። በኢትዮጵያ መንግሥት በእና በህወሓት መካከል፣ ጥቅምት 23 ቀን 2015 ዓ.ም. በደቡብ አፍሪካ-ፕሪቶርያ ላይ የተደረገውን ተኩስ የማቆም የሰላም ስምምነት ተከትሎ፣ የቀድሞ ተዋጊዎችን ትጥቅ በማስፈታት፣ ወደ ኅብረተሰቡ መልሶ የማዋሐድና በማቋቋም መርሐ ግብር ከሁለት ዓመት መዘግየት በኋላ ነገ እንደሚጀምር፣ የኢትዮጵያ ብሔራዊ ተሃድሶ ኮሚሽን አስታውቋል። ኮሚሽነር ተመስገን ጥላሁን፣ ዛሬ ኅዳር 11 ቀን 2017 ዓ.ም በሰጡት መግለጫ፣ ለዚህ ሥራ ሲባል በክልሉ የቀድሞ ተዋጊዎችን ተቀብሎ ለማሠልጠን የሚያስችሉ በመቐለ፣ በዕዳጋ ሐሙስና በዓድዋ ከተሞች ሦስት ማዕከላት መከፈታቸውን ተናግረዋል፡፡ ሒደቱም፣ የቀድሞ ተዋጊዎችን ካሉበት የጦር እዝ በማላቀቅ ወደ ማዕከላት ማሰባሰብ፣ ማሰልጠን፣ ወደ ኅብረተሰቡ መቀላቀልና መልሶ ማቋቋምን እንደሚያካትት ኮሚሽነሩ ገልጸው፣ ይህንንም ነገ፣ ኅዳር 12 ቀን 2017 ዓ.ም መቐለ በሚገኘው የማሰልጠኛ ማዕከል እንደሚጀመር ጠቁመዋል። ኮሚሽነሩ፣ “በምዕራፍ አንድ የትግበራ መርሐ ግብር ፣ በዚህ ሳምንት ከትግራይ ክልል 75 ሺሕ የቀድሞ ተዋጊዎችን የሚያካትት ሥራ እንጀምራለን፡፡ በዚህ ዙር በአብዛኛው የአካል ጉዳት የደረሰባቸው ሴቶችና በዕድሜ የገፉ ሰዎች ላይ ትኩረት በማድረግ ትግበራውን እንጀምራለን፡፡” ብለዋል። የቀድሞ ተዋጊዎችን በአራት ወራት ለማቋቋም ከኢትዮጵያ መንግሥት አንድ ቢሊዮን ብር፣ ከዓለም አቀፍ ለጋሾች ደግሞ 60 ሚሊዮን ዶላር በጀት መገኘቱን ኮሚሽነሩ ተናግረዋል፡፡ ወደ መቐለ ማሰልጠኛ ማዕከል የሚገቡት የመጀመሪያዎቹ 320 የቀድሞ ተዋጊዎች፣ ዛሬ ከሰዓት ጀምሮ እስከ ነገ ሙሉ ቀን የመከላከያ ሰራዊት አባላት በተገኙበት፣ ትጥቅ የማስረከብ እንደሚያከናውኑም ኮሚሽነሩ አክለው ገልፀዋል። ስለጉዳዩ ከትግራይ ክልል ጊዜያዊ አስተዳደርና ከጸጥታው ዘርፍ አስተያየት ለማግኘት ያደረግነው ጥረት ለዛሬ አልተሳካም፡፡ /የዚህ ዘገባ ዝርዝር በምሽቱ የራዲዮ ፕሮግራም ይቀርባል/   ... የአሜሪካ ድምፅ 17 hr ⟶
በእስራኤል ጥቃት 17 ሰዎች መገደላቸውን የጋዛ ጤና ባለሥልጣናት ተናገሩ Public Domain  — በጋዛ ሰርጥ ዛሬ ረቡዕ  እስራኤል በተከታታይ ባደረሰቻቸው ጥቃቶች በትንሹ 17 ፍልስጥኤማውያን መገደላቸውን የጋዛ የጤና ባለሥልጣናት ተናግረዋል። በአንደኛው የእስራኤል ጥቃት በሰሜን ጋዛ ጃባሊያ አካባቢ የሚገኝ መኖሪያ ቤት በመመታቱ ቢያንስ 12 ሰዎች ተገድለዋል። በሰሜን ጋዛ ከሃማስ ታጣቂዎች ጋራ በተደረገ ውጊያ ከወታደሮቹ አንዱ መገደሉና አንደኛው መቁሰሉን የእስራኤል ጦር ዛሬ ረቡዕ አስታውቋል። በደቡባዊ ሊባኖስ፣ የእስራኤል ኃይሎች እና የሂዝቦላህ ታጣቂዎች ለተከታታይ ወራት በተባባሰ ውጊያ ላይ ሲኾኑ  የሊባኖስ ጦር ከወታደሮቹ አንዱ በእስራኤል ተኩስ መገደሉን እና የእስራኤል ወታደሮች በሊባኖስ ጦር ተሽከርካሪ ላይ ጥቃት ማድረሳቸውን ዛሬ አስታውቋል። የፈረንሳይ የውጭ ጉዳይ ሚኒስቴር ዛሬ ረቡዕ፣ ባወጣው መግለጫ እንዳስታወቀው፣ በሊባኖስ የተባበሩት መንግሥታት ተልእኮ አካል የኾኑት የፈረንሳይ ወታደሮች ተተኩሶባቸዋል፡፡ መግለጫው አክሎም “ወታደሮቹ እንደልብ ተዘዋውረው ተልእኮቸውን የመፈጸም ነጻነታቸው ሊጠበቅ እንደሚገባ” አሳስቧል፡፡ የዩናይትድ ስቴትስ ልኡክ አሞስ ሆችስቴይን በእስራኤል እና በኢራን በሚደገፈው በሂዝቦላ መካከል እየተካሄደ ያለውን ጦርነት የሚያቆም የተኩስ አቁም ስምምነት ሊደረስ እንደሚችል ያላቸውን ተስፋ ትላንት ማክሰኞ ገልጸዋል፡፡ "ይህን ግጭት ለማቆም ተጨባጭ እድል አለን" ያሉት ሆችስቴይን የሄዝቦላህ ታጣቂዎች አጋር ናቸው የተባሉትን ሸምጋዩን የፓርላማ አፈ-ጉባዔ ናቢህ ቤሪን ጨምሮ፣ ከሊባኖስ ባለስልጣናት ጋር "በጣም ገንቢ ውይይት" አድርገናል ብለዋል። "የሊባኖስ መንግሥት እና ሂዝቦላህ ባለፈው ሳምንት በቀረበው ሀሳብ ተስማምተዋል፣ ሁለቱም በይዘቱ ላይ አንዳንድ አስተያየቶችን ሰጥተዋል" ሲሉ የቤሪ ረዳት የሆኑት አሊ ሀሰን ካሊል ከትላንት በስትያ ሰኞ ለሮይተርስ ተናግረዋል። የእስራኤል ጠቅላይ ሚኒስትር ቤንጃሚን ኔታንያሁ የተኩስ አቁም ስምምነት ቢደረስም እስራኤል በሂዝቦላህ ላይ ወታደራዊ ዘመቻዋን እንደምትቀጥል ተናግረዋል። ኔታንያሁ ለእስራኤል ፓርላማ ባደረጉት ንግግር  "ዋናው ነገር  በወረቀት ላይ የሚሰፍረው (ስምምነት) አይደለም" ብለዋል። ... የአሜሪካ ድምፅ 17 hr ⟶
ኢራን ዓለም አቀፍ ግፊቶችን ችላ በማለት የኒውክሊየር መርሃ ግብሯን ገፍታበታለች Public Domain  — ኢራን የኒውክሊየር መርሃ ግብሯን እንድትገታ የቀረቡላትን ዓለም አቀፍ ጥያቄዎች ወደ ጎን በመተው የዩሬኒየም ክምችቷን ለጦር መሣሪያ ማምረቻ ወደተቃረበ ደረጃ እያሳደገች ነው ሲል የተባበሩት መንግሥታት የኒውክሊየር ተቆጣጣሪ ተቋም ሚስጥራዊ ዘገባ አመለከተ፡፡ ትላንት ማክሰኞ አሶሲየትድ ፕሬስ ያገኘው የዓለም አቀፉ የአቶሚክ ኃይል ተቆጣጣሪ  ተቋም ዘገባ፣ ኢራን የዩሬኒየም ክምችቷን ወደ 60 ከመቶ ከፍ ማድረጓን አመልክቷል፡፡ ዘገባው እንዳመለከተው እ.ኤ.አ ጥቅምት 26 ኢራን 182.3 ኪሎ ግራም ዩሬኒየም ክምችት የነበራት ሲሆን  በነሀሴ ወር ከወጣው ሪፖርት ወዲህ የ17.6 ኪሎ ግራም  ጭማሪ አሳይቷል። የዩራኒየም መጠኑ ክምችት 60 ከመቶ ደረሰ ማለት ወደ ሙሉ የኒውክሌር ጦር መሳሪያነት ለመቀየር ያስፈልጋል ለተባለው የ90 ከመቶ መስፈርት ጥቂት የሚቀረው መሆኑ በዘገባው ተጠቅሷል፡፡ ኢራን የኒውክሌር መርሃ ግብሯ ለጦር መሣሪያነት ሳይሆን ለልማት ዓላማ የሚውል መሆኑን ትናገራለች፡፡ የዓለም አቀፉ የአቶሚክ ኅይል ቁጥጥር  ተቋም ግን መርሃ ግብሩ በድብቅ ለጦር መሣሪያ ማምረቻ እንደማይውል ዋስትና እንደማይሰጥ አስጠንቅቋል። ሪፖርቶቹ በቅርብ ወራት ውስጥ እስራኤል እና ኢራን በቅርቡ የሚሳይል ጥቃትን የተለዋወጡ ሲሆን ከአንድ አመት በላይ በዘለቀው የጋዛ ጦርነት እስራኤል እና በኢራን የሚደገፈው ሃማስ ውጊያ ወሳኝ ደረጃ መድረሱን አመልክተዋል፡፡ ምንም እንኳ ኢራን ከዓለም ኃያላን ሀገራት ጋር የገባችው የኒውክሊየር ስምምነት እልባት ያላገኘ ቢሆንም የፕሬዝዳንት ትረምፕ ዳግም መመረጥ የተወሳሰበውን ጉዳይ በምን መልኩ ሊፈታው እንደሚችል ጥያቄ አስነስቷል፡፡ በዩናትይትድ ስቴትስ፣ በእንግሊዝ፣ በፈረንሣይ እና በጀርመን የሚመሩ ምዕራባውያን ሃገራት በቅርቡ በሚካሄደው የዓለም አቀፉ የአቶሚክ ኅይል ተቋም ቦርድ ስብሰባ ላይ ለስምምነቱ አለመሳካት ኢራንን ለመውቀስ አቅደዋል፡፡ ይህም ለተጨማሪ የኒውክሊየር መርሃ ግብሮች መባባስ ስጋት ሊሆን እንደሚችል አስግቷል፡፡ ... የአሜሪካ ድምፅ 17 hr ⟶
በአዲስ አበባ ም/ቤት ያለመከሰስ መብታቸውን የተነሳው አቶ ሰዒድ አሊ መታሰራቸውን ፖሊስ አስታወቀ Public Domain  — ከኮሪደር ልማት ጋራ በተያያዘ በሙስና ወንጀል ተጠርጥረው ዛሬ ጠዋት ያለመከሰስ መብታቸው የተነሳው የአዲስ አበባ ከተማ ምክር ቤት አባል አቶ ሰዒድ አሊ፣ ዛሬ ከቀኑ ስድስት ሰዓት ጀምሮ መታሰራቸውን ፖሊስ አስታወቀ። የአዲስ አበባ ከተማ ፖሊስ ሕዝብ ግንኙነት ዳይሬክተር፣ ምክትል ኮማንደር ማርቆስ ታደሰ “ግለሰቡ ያለመከሰስ መብታቸው ከተነሳ በኋላ፣ ዛሬ ከቀኑ ስድስት ሰዓት ላይ ከመኖርያ ቤታቸው በአዲስ አበባ ፖሊስ በቁጥጥር ስር ውለው በፖሊስ ኮሚሽኑ ምርመራ እየተደረገባቸው ይገኛል ” ብለዋል። አክለውም፣  “ጉዳዩ በምርመራ ላይ ያለ በመኾኑ ዝርዝር ሁኔታውን ከዚኽ በላይ ለመግለጽ እንቸገራለን። የምርመራ  ሥራው ከተጠናቀቀ ለሚዲያም ለሕዝብም እናሳውቃለን” ብለዋል። የአቶ ሰዒድን ያለመከሰስ መብት መነሳት በተመለከተ፣ የምክር ቤቱ የፍትህና መልካም አስተዳደር ቋሚ ኮሚቴ ሰብሳቢ አቶ ሙሉነህ ደሳለኝ ለምክር ቤቱ በጹሑፍ ባቀረቡት የውሳኔ ሐሳብ፣ አቶ አቶ ሰዒድ አሊ በሙስና ወንጀል በመጠርጠራቸው የወንጀል ምርመራ መዝገብ በዐቃቤ ሕግ ተከፍቶባቸው እንደነበር አስታውቀዋል። በዚኹ በንባብ በቀረበውና በከተማው አስተዳደር መገናኛ ብዙኃን ላይ በተላለፈው የውሳኔ ሐሳብ፣ አቶ ሰኢድ ከማል፣ የልደታ ክፍለ ከተማ ዋና ሥራ አስፈፃሚ በነበሩበት ወቅት የኮሪደር ልማቱን ምክንያት በማድረግ፣ አኹን በእስር ላይ ከሚገኙ አራት የልደታ ክፍለ ከተማ ሠራተኞችና  ከግል ባለሀብት ጋራ በመመሳጠር የመንግሥት ሀብትን ለግል ጥቅም እንዲውል አድርገዋል በሚል ተጠርጥረው የወንጀል ምርመራ ሲደረግባቸው መቆየቱ ተገልጿል። ፍትሕ ሚኒስቴር በሚኒስትሯ ፊርማ በተጻፈ ደብዳቤ የምክር ቤት አባሉ ያለመከሰስ መብት እንዲነሳ  የጠየቁበትን ደብዳቤ ኮሚቴው በጥልቀት መመልከቱን ሰብሳቢው ለምክር ቤቱ በንባብ አሰምተዋል።  በተጨማሪም ኮሚቴው የወንጀል ምርመራ መዝገቡን ከመረመረና፣ ከዐቃቤ ሕግ ጋራ በጉዳዩ ላይ ከተወያየ በኋላ፣ የምክር ቤት አባሉን የሕግ ከለላ ለማንሳት የሚያስችል በቂ አመላካች ኹኔታ አለ ብሎ በማመኑ ያለመከሰስ መብታቸው እንዲነሳ የውሳኔ ሐሳብ ማቅረቡን ገልጿል።  በቀረበው የውሳኔ ሐሳብ መሰረትም የምክር ቤት አባሉ ያለመከሰስ መብት ተነስቷል። ከውሳኔው በኋላ የምክር ቤት አባሉን ለማግኘት ጥረት ስናደርግ የቆየን ቢኾንም፣ በኋላ ላይ በፖሊስ ቁጥጥር ስር መዋላቸውን ከፖሊስ ለማወቅ ችለናል። ... የአሜሪካ ድምፅ 1 d ⟶
በዘንድሮው የአሜሪካ ምርጫ የአፍሪካውያን ተቀዳሚ ትኩረት ኢኮኖሚያዊ ጉዳይ እንደነበረ ተገለጸ Public Domain  —  “ዩስ አፍሪካ ኢንስቲትዩት” የተሰኘ ተቋም ከምርጫው በፊት በሠራው የዳሰሳ ጥናት ኢትዮጵያውያን ጨምሮ አፍሪካውያን በዘንድሮው ምርጫ የኢኮኖሚ፣ የስደተኝነትና የጤና ፖሊሲዎች በምርጫው ትኩረት የሰጧቸው አንገብጋቢ ጉዳዮች እንደነበሩ የተቋሙ ፕሬዘዳንት ዶክተር ታዲዮስ በላይ ተናግረዋል። በዚህ የዳሰሳ ጥናት ከ2ሺሕ በላይ በዩናይትድ ስቴትስ እና በአህጉሪቱ የሚኖሩ አፍሪካውያን አስተያየታቸውን ሰጥተዋል ተብሏል፡፡ ... የአሜሪካ ድምፅ 1 d ⟶
በትረምፕ መመረጥ የተበረታቱ አይሁድ ሰፋሪዎች ዌስት ባንክን ወደ ራሳቸው እንደሚቀላቅሉ ተስፋ አድርገዋል Public Domain  —  በዌስት ባንክ የሚኖሩ የአይሁድ ሰፋሪዎች ዶናልድ ትረምፕ መመረጣቸውና ማይክ ሃካቢን በእስራኤል የአሜሪካ አምባሳደር አድርገው መሾማቸውን በደስታ ተቀብለውታል። ዌስት ባንክን ወደ ራሳቸው ለመቀላቀል እና በጋዛ ውስጥ ሳይቀር የሰፈራ መንደር ለመገንባት ተስፋ እንዳላቸው ይናገራሉ። የቪኦኤ ዘጋቢ ሊንዳ ግራንድስቴን ከዌስት ባክን ከዱሚም የሰፋሪዎች መንደር ያጠናቀረችውን ዘገባ ነው፡፡ ... የአሜሪካ ድምፅ 1 d ⟶
በሶማሊላንድ ፕሬዝደንታዊ ምርጫ የተቃዋሚ ፓርቲው ዕጩ አሸነፉ Public Domain  —  በሶማሊላንድ ባለፈው ሳምንት በተካሄደው ፕሬዝደንታዊ ምርጫ የተቃዋሚ ፓርቲ መሪው መሐመድ አብዱላሂ (ኢሮ) የወቅቱን ፕሬዝደንት ሙሴ ቢሂ አብዲን ማሸነፋቸውን ብሔራዊ ምርጫ ኮሚሽን ዛሬ ማክሰኞ አስታወቀ፡፡ ቢሂ የምርጫውን ውጤት እንደሚያከብሩ ገልጸዋል፡፡ ... የአሜሪካ ድምፅ 1 d ⟶
በመርካቶ ገበያ ትላንት የተጀመረው ሱቅ የመዝጋት አድማ ዛሬም ቀጥሏል Public Domain  —  መንግሥት እያካሄደ ባለው የደረሰኝ ቁጥጥርና ቅጣት ምክንያት፣ ነጋዴዎች ከትላንት ጀምሮ መደብሮቻቸውን በመዝጋት ፣ አድማ ላይ መኾናቸውን የሱቅ ባለንብረቶች ተናግረዋል። ከአድማው በተጨማሪ ከመጋዘን እቃ የማሸሽ ተግባርም መኖሩን የገለፁት ነጋዴዎቹ፣ በዚህም ምክንያት ገበያ መቀዛቀዙን ገልፀዋል። የአዲስ አበባ ከተማ ከንቲባ አዳነች አበቤ በበኩላቸው፣ “ቁጥጥሩ የተጀመረው በርካታ ሕገ ወጥ አሠራሮች ስላሉ ነው” ሲሉ ዛሬ በተካሔደው የከተማው ምክር ቤት መደበኛ ስብሰባ ላይ ተናግረዋል፡፡ ... የአሜሪካ ድምፅ 1 d ⟶
ሀገራዊ ምክክር ኮሚሽን በአማራ እና ትግራይ ክልሎች ሥራውን ለመቀጠል የመንግሥትን ድጋፍ ጠየቀ Public Domain  —  የኢትዮጵያ ሀገራዊ ምክክር ኮሚሽን፣ የሦስት ወር የሥራ አፈጻጸም ሪፖርቱን፣ ዛሬ ማክሰኞ፣ ኅዳር 10 ቀን 2017 ዓ.ም. ለሕዝብ ተወካዮች ምክር ቤት ሲያቀርብ፣ በአማራ ክልል በግጭት፣ በትግራይ ደግሞ በቅድመ ሁኔታዎች ምክንያት ሥራውን ማስቀጠል እንዳልቻለ አስታውቋል። ሪፖርቱን ያቀረቡት ዋና ኮሚሽነሩ ፕሮፌሰር መስፍን አርኣያ፣ በዘጠኝ ክልሎች እና ሁለት የከተማ አስተዳደሮች የምክክር አጀንዳ የማሰባሰብ ሥራ መጠናቀቁን እና የኦሮሚያ ክልል በሦስት ሳምንታት ውስጥ እንደሚጠናቀቅ ገልፀዋል፡፡ የኮሚሽኑ የሥራ ጊዜ ሊጠናቀቅ የሚጠናቀቀው በሦስት ወር ጊዜ ውስጥ ሲኾን፣ የኮሚሽኑን ቆይታ የማራዘም ጉዳይ የምክር ቤቱ ውሳኔ መኾኑን ፕሮፌሰር መሥፍን ጥያቄውን ላነሱት የፓርላማ አባላት በሰጡት ምላሽ ተናግረዋል። ከምክር ቤቱ ለተነሱላቸው ጥያቄዎችም የአገራዊ ምክክር ኮሚሽን ኮሚሽነሮች ምላሽ ሰጥተዋል፡፡ ... የአሜሪካ ድምፅ 1 d ⟶
“ከፊሊፒንስ ጋራ ያለን  አጋርነት ከአስተዳደሮች መለዋወጥም የሚሻገር ነው" ሲሉ የዩናይትድ ስቴትሱ የመከላከያ ሚንስትር ተናገሩ Public Domain  — የዩናይትድ ስቴትስ የመከላከያ ሚንስትር ሎይድ ኦስቲን፣ ቻይና በፊሊፒንስ ላይ የወሰደችውንና ‘አደገኛ’ ያሉትን ድርጊት አውግዘው፤ በአወዛጋቢው የደቡብ ቻይና ባህር የፊሊፒንስ ኃይሎች ጥቃት ቢደርስባቸው፤ ‘ዩናይትድ ስቴትስ ከሀገራቸው ወታደራዊ የትብብር ስምምነት ያላትን ማኒላን ትከላከላለች’ ሲሉ ቀደም ሲል ያሰሙትን ማስጠንቀቂያ አጽንኦት ሰጥተው ደግመዋል። አዲሱን የ500 ሚሊዮን ዶላር ወታደራዊ እገዛ ጨምሮ፣ አገራቸው ለፊሊፒንስ የምትሰጠው ጠንካራ ወታደራዊ ድጋፍ በፕሬዝዳንት ዶናልድ ትራምፕ አስተዳደርም ይቀጥል እንደሆን፤ በፊሊፒንሷ ፓላዋ ግዛት በሥራ ጉብኝት ላይ ባሉበት ወቅት የተጠየቁት ኦስቲን  የሚቀጥለውን የአስተዳደር እርምጃ መገመት እንደማይችሉ ተናግረዋል። ሆኖም በሁለቱ አገሮች መካከል ያለው ጠንካራ ጥምረት በአገሮቹ ውስጥ የሚደረጉትን “የአስተዳደሮች መለዋወጥ ተሻግሮ ይቀጥላል" የሚለውን እምነታቸውን ገልጸዋል። ... የአሜሪካ ድምፅ 1 d ⟶
የውጭ ምንዛሪ ልውውጥ የሚያከናውኑት የግል ኩባንያዎች Public Domain  —  በኢትዮጵያ የውጭ ምንዛሪ ልውውጥ በገበያ ዋጋ እንዲወሰን የወጣውን ፖሊሲ ተከትሎ የውጭ ምንዛሪ አቅርቦት እየሰፋ መምጣቱን የአሜሪካ ድምጽ ያነጋገራቸው ባለሞያዎች ተናግረዋል፡፡ ይኹን እንጂ በጥቁር ገበያውና በመደበኛው የባንክ ምንዛሪ መካከል ያለው ልዩነት ተስፋና ስጋት መፍጠሩንም ባለሞያዎቹ ገልጸዋል፡፡ ከባንኮች በተጨማሪ የውጭ ምንዛሪ ግብይት አገልግሎት እንዲሰማሩ ብሄራዊ ባንክ ፈቃድ ከሰጣቸው አምስት የግል ኩባንያዎች መካከል አንዱ የኾነው የኢትዮ ፎሬክስ አክስዮን ማኅበር መስራችና ዋና ሥራ አስፈጻሚ አቶ ኤፍሬም ተስፋዬ ፖሊሲው አዎንታዊ ለውጥ እያመጣ መሆኑን ይናገራሉ፡፡ የምጣኔ ሀብቱ ባለሞያው አቶ ያሬድ ኃይለመስቀል በበኩላቸው ለውጥ መኖሩን ቢቀበሉም የውጭ ምንዛሬው ዘለቄታዊ በኾነ መንገድ ሊቀረፍ የሚችለው የጥቁር ገበያው ተፈላጊነት እየቀነሰ ሲመጣ፣ ለውጡ በውጭ ንግድ ምርቶች ሲደገፍና ከገቢ ሸቀጦች ጋራ ሲገናዘብ ብቻ መሆኑን ይገልጻሉ፡፡ /ዝርዝሩን ከተያይዘው ፋይል ይከታተሉ/ ... የአሜሪካ ድምፅ 1 d ⟶
ዩናይትድ ስቴትስ ለዩክሬይን የምትሰጠውን ዕርዳታ መጠን ስታደርግ ’ጂ-20’ ቡድን ውስጥ ልዩነቶች እየታዩ ነው Public Domain  —  የፕሬዝዳንት ጆ ባይደን የሥልጣን ዘመን ሊያበቃ በቀረው የሁለት ወራት ዕድሜ ውስጥ አስተዳደራቸው ዩክሬይን የሩሲያን ወረራ ለመከላከል ለያዘችው ጥረት የሚሰጠውን የገንዘብ፣ የወታደራዊ እና የዲፕሎማሲያዊ ድጋፎች አሳድጓል። ሃያ የዓለም ሃገራት የተካተቱበትን የቡድን  20 የመሪዎች ጉባኤ እያስተናገደች ባለችው የብራዚሏ የባሕር ዳርቻ ከተማ ሪዮ ዲ ጄኔሮ የዩናይትድ ስቴትስ ባለሥልጣናት ለዩክሬን የሚሰጠውን ድጋፍ አስመልክቶ “ብርቱ” ግፊት እያደረጉ መሆናቸውን የዩናይትድ ስቴትስ የብሔራዊ ደኅንነት ጉዳዮች ምክትል አማካሪ ጃን ፋይነር በትላንትናው ዕለት ለአሜሪካ ድምጽ በሰጡት መግለጫ አስታውቀዋል። ሩስያ ባለፈው ሳምንት መገባደጂያ በዩክሬይን የፈጸመችውን የአየር ድብደባ ተከትሎ፤ ምዕራባውያን ዲፕሎማቶች በሞስኮ ላይ ጠንካራ ትችት እንዲሰነዘር ግፊት እያደረጉ ነው። የሰሞኑም የሩስያ የአየር ጥቃት ለወራት ከታዩት ሁሉ ግዙፉ መሆኑ ተመልክቷል። ባለስልጣናቱ አክለውም የሩስያ  ጥቃት ማየል ‘ከአውሮፓ የሚሻገር ያለመረጋጋት ተጽእኖ ሊያስከትል እንደሚችል’ አስጠንቅቀዋል። በሩስያዋ የከርስክ ግዛት የዩክሬን ኃይሎች የተቆጣጠሩትን አካባቢ ለማስለቀቅ   ከ10 ሺሕ ላይ የሚሆኑ የሰሜን ኮሪያ ወታደሮች ሞስኮ መግባታቸውን ዩናይትድ ስቴትስ እና ዩክሬን በወሩ መጀመሪያ ላይ ማስታወቃቸው ይታወሳል።  ሆኖም የመጨረሻው የመሪዎች መግለጫ ዩናይትድ ስቴትስ ግፊት ያደረገችበትን አገላለጽ አላካተተም። መግለጫው ሩስያ የወሰደችውን እርምጃ ሳያወግዝ፤ ዩክሬን ውስጥ እየተካሄደ ባለው ጦርነት ሳቢያ በሰው ልጆች ላይ በሚደርሰው ስቃይ እና በአለም አቀፍ ኢኮኖሚ ላይ ባስከተለው አሉታዊ ተፅእኖ ላይ ትኩረት አድርጓል። የመካከለኛውን ጦርነት አስመልክቶም በጋዛ እና በሊባኖስ የተኩስ አቁም እንዲደረስ እና እስራኤል እና ፍልስጤም ነጻ ሃገር ሆነው በሰላም የሚኖሩበት የሁለት-አገሮች መፍትሄ የተባለው ይሳካ ዘንድ የሚያስፈልገውን ቁርጠኝነት ጠይቋል። የእስራኤልን ራስን የመከላከል መብት በተመለከተ ያለው የለም። ፋይነር አክለውም፤ በቡድኑ ከታቀፉት አገሮች ስብጥር አንጻር አለም አቀፍ ግጭቶችን አስመልክቶ ሁሉም የሚስማሙበት ሃሳብ መቅረጽ ቀላል አለመሆኑን አምነዋል። ይህ በእንዲህ እንዳለ ለኪቭ የምትሰጠውን ወታደራዊ ዕርዳታ ያሳደገችው ዩናይትድ ስቴትስ፤ ዩክሬን አሜሪካ-ሰራሹን የረዥም ርቀት ሚሳይሎች በሩሲያ ድንበር ውስጥ ያሉ ኢላማዎችን ለመምታት እንድትጠቀምበት ፍቃድ መስጠቷን ስማቸው እንዳይጠቀስ የፈለጉ ባለስልጣናትን ጠቅሰው የተለያዩ መገናኛ ብዙኃን ዘግበዋል። ቡድን 20 - ባብዛኛው ተመሳሳይ እይታ የሚጋሩት የሰባቱ የዓለም ባለ ጸጋ ሃገሮች ካሉበት ቡድን 7 በተጨማሪ፤ ሩስያን፣ ቻይናን፤ እንዲሁም በደቡቡ  የዓለም ንፍቀ ክበብ የሚገኙት አንዳንድ በማደግ ላይ ያሉ ሃገራት ያጠቃልላል። ... የአሜሪካ ድምፅ 1 d ⟶
በሶማሊላንድ ፕሬዚደንታዊ ምርጫ የተቃዋሚ ፓርቲው መሪ አሸነፉ Public Domain  — በሶማሊላንድ ባለፈው ሳምንት በተካሄደው ፕሬዚደንታዊ ምርጫ የተቃዋሚ ፓርቲ መሪው መሐመድ አብዱላሂ ኢሮ ፕሬዚደንት ሙሴ ቢሂ አብዲን ማሸነፋቸውን የምርጫ ኮሚሽኑ ዛሬ ማክሰኞ አስታወቀ፡፡ ገለልተኛ ታዛቢዎች ምርጫውን "ሰላማዊ "ሲሉ ገልጸውታል፡፡ የብሔራዊ ፓርቲው የዋዳኒ ፕሬዚደንታዊ እጩ አብዲራህማን መሐመድ አብዱላሂ (ኢሮ) 63 ነጥብ 92 ከመቶውን የመራጭ ድምጽ ያገኙ ሲሆን ፕሬዚደንት ቢሂ 34 ነጥብ 81 ከመቶ፡ ሦስተኛው እጩ 0 ነጥብ 74 ከመቶውን ማግኘታቸውን የሶማሊላንድ ብሔራዊ የምርጫ ኮሚሽን ሊቀመንበር ሙሴ ሀሰን ዩሱፍ ሐርጌሳ ላይ ይፋ አድርገዋል፡፡ የ69 ዓመቱ ኢሮ ለአምስት ዓመት ሶማሊላንድን ሊመሩ እ አ አ ታሕሳስ 13 ቀን ቃለ መሐላ ይፈጽማሉ፡፡ ብሐራዊ የምርጫ ኮሚሽኑ የምርጫውን ውጤት እንዲያጸድቅ ለከፍተኛ ፍርድ ቤቱ እንደሚያቀርበው ተመልክቷል፡፡ የሶማሊላንድ ምርጫ እአአ በ2022 ዓም ሊካሂድ ታቅዶ የነበረ ሲሆን በፖለቲካ ልዩነቶች የተነሳ እስካሁን ዘግይቷል፡፡ እአአ በ2017 በተካሄደው በቀደመው ምርጫ የዋዳኒ ፓርቲውን መሪ አሸንፈው ስልጣን የያዙት ቢሂ የምርጫውን ውጤት አከብራለሁ ብለዋል፡፡ ይህ በእንዲህ እንዳለ የኢትዮጵያ የውጭ ጉዳይ ሚንስቴር ለተመራጩ ፕሬዚደንት የእንኳን ደስ ያለዎ መልዕክት አስተላልፉል፡፡ የውጭ ጉዳይ ሚንስቴሩ ባወጣው አጭር መግለጫ "ተመራጩ ፕሬዚደንት እና ፕሬዚደንት ሙሴ ቢሂ መሐመድ ያሳዩትን ዲሞክራሲያዊ አመራር ኢትዮጵያ ታደንቃለች " ብሏል፡፡ የሶማሊያ ፕሬዚደንት ሀሰን ሼክ መሐሙድም ለተመራጩ ፕሬዚደንት የእንኳን ደስ ያለዎ መልዕክት አስተላልፈዋል፡፡ ፕሬዚደንት መሐሙድ ለሶማሊያ ሕዝብ እድገት እና አንድነት ወሳኝ ለሆነው እርቀ ሰላም የሚደረገው ንግግር እንዲጠናቀቅ ቁርጠኛነታቸው ያሳወቁ መሆኑን የሶማሊያ መንግሥት የዜና ማሰራጫ ዘግቧል፡፡ በሶማሊያ የዩናይትድ ስቴትስ ኤምባሲም በበኩሉ ምርጫውን አስመልክቶ ለሶማሊላንድ ሕዝብ እና ለተመራጩ ፕሬዚደንት እንኳን ደስ ያላችሁ በማለት መልዕክት አስተላልፏል፡፡ ኤምባሲው በኤክስ ገጹ ባወጣው ጽሁፍ "የሶማሊላንድ አስደናቂ የምርጫዎች እና የሰላማዊ የስልጣን ሽግግር ተሞክሮ ለቀጣናው ብቻ ሳይሆን አልፎም አርአያ የሚሆን ነው" ብሏል፡፡ ... የአሜሪካ ድምፅ 1 d ⟶
የኢትዮጵያ መንግሥት ሲቪሎች ላይ ያነጣጠረ ጥቃት ያደርሳል መባሉን አስተባበለ Public Domain  —  መቀመጫቸውን በውጭ አገራት ያደረጉና በኢትዮጵያ ቋንቋ የሚያሰራጩ መደበኛ መገናኛ ብዙኃን መንግሥት የሚወስደውን እርምጃ ሲቪሎች ላይ የተወሰደ እርምጃ አድርገው ያቀርባሉ ሲል የኢትዮጵያ መንግሥት ክስ አሰማ። የመንግሥት ኮምዩኒኬሽን አገልግሎት ሚኒስትር ለገሠ ቱሉ፣ ባለፈው ቅዳሜ በሰጡት መግለጫ መንግሥት እየወሰደ ነው ያሉትን እርምጃ "የተመጣጠነ እና የታቀደ" ሲሉ ገልጸዋል። የመገናኛ ብዙኃኑን በስም ያልጠቀሱት ሚኒስትሩ፣ማብራሪያቸው የትኛውን እርምጃ መሠረት እንዳደረገም በግልጽ አላስቀመጡም። /ዝርዝር ዘገባውን ከተያያዘው ፋይል ያድምጡ/ ... የአሜሪካ ድምፅ 2 d ⟶
የእግር ጉዞ ማዘውተር ለአንጎል ጤና የሚያስገኘው የላቀ ጠቀሜታ Public Domain  —  የእግር ጉዞ፣ የቤት ውስጥ ሥራ አለያም ሌሎች መሰል ቀላል የአካል እንቅስቃሴዎችን አዘውትሮ ማድረግ ለአንጎል ጤና ከፍ ያለ ጥቅም የሚያገኝ መሆኑን በቅርቡ ይፋ የተደረገ አንድ የሳይንሳዊ ምርምር ጽሑፍ አመለከተ። የአንጎልን አሠራር ማቀላጠፍ እና የዓመታት ወጣትነት ማጎናጸፍ መቻሉ ተገልጿል። ሞያዊ ትንታኔውን የሰጡን ፕሮፌሰር ዮናስ እንዳለ ገዳ የነርቭና የአእምሮ ሃኪም፣ እንዲሁም በባሮ የነርቭ ሕክምና ተቋም መምህር እና ተመራማሪ ናቸው። ፕሮፌሰር ዮናስ ካሁን ቀደም ቀላል የአካል እንቅስቃሴዎች ዕድሜያቸው ከሰባ ዓመት በላይ የሆኑ አረጋውያን በተመሳሳይ ቀላል የአካል እንቅስቃሴ በማድረግ ብቻ ከመጃጀት ጋራ ተያይዘው የሚመጡ በሽታዎችን በመከላከል የሚረዱ መሆናቸውን ያረጋገጠ ለከፍተኛ እውቅና የበቃ ሳይንሳዊ የምርምር ሥራ አካሂደዋል። ሞያዊ ትንታኔውን ከተያያዘው ፋይል ይከታተሉ። ... የአሜሪካ ድምፅ 2 d ⟶
አሜሪካ ለፕሬዝዳንታዊ ሽግግር እየተዘጋጀች ነው Public Domain  —  ተመራጩ ፕሬዝዳንት ዶናልድ ትረምፕ ሥልጣን ለመረከብ እየተዘጋጁ ባሉበት ወቅት ሥልጣንን ከተሰናባቹ ወደ አዲሱ አስተዳደር የማሸጋገር ሂደት ከብርቱ ጥንቃቄ ጋራ በቅንጅት እየተካሄደ ነው። ባለሞያዎች የፌደራል መንግሥት በአሜሪካ ዲሞክራሲ ውስጥ ወሳኝ ለኾነው ለዚህ ጊዜ እንዴት እንደሚዘጋጅ ሐሳባቸውን ያካፍላሉ። የቪኦኤዋ ዘጋቢ ሳሌም ሰለሞን ያጠናቀረችውን ዘገባ ከተያያዘው ፋይል ይከታተሉ። ... የአሜሪካ ድምፅ 2 d ⟶
ባይደን አማዞን ደንን በመጎብኘት ለአየር ንብረት ያላቸውን ቁርጠኝነት አሳይተዋል Public Domain  —  የዩናይትድ ስቴትሱ ፕሬዝዳንት ጆ ባይደን የአየር ንብረት ለውጥን ለመዋጋት የሚያደርጉትን ጥረት ለማጉላት፤ ትላንት እሁድ ታሪካዊ የተባለውን ጉብኝት በማድረግ ወዳ ብራዚል አቅንተዋል፡፡ ይኸም የአማዞን ጥቅጥቅ ደንን የጎበኙ የመጀመሪያው በሥልጣን ላይ የሚገኙ የአሜሪካ ፕሬዝዳንት አድርጓቸዋል፡፡ ፕሬዘዳንቱ በሪዮ ዲጄኔሮ በአየር ንብረት ለውጥ፣ በድህነት ቅነሳና በሌሎችም ዓለም አቀፍ ጉዳዮች ለውይይት በሚቀርቡበት የዓለም ግዙፍ ምጣኔ ሃብት ያላቸው የቡድን 20 የመሪዎች በሚሳተፉበት ጉባኤ ላይ ይታደማሉ፡፡ የዋይት ኋውስ ቢሮ ዋና ሃላፊ ፓትሲ ዊዳስኩዋራ ያሰናዳችውን ዘገባ ከተያያዘው ፋይል ይከታተሉ። ... የአሜሪካ ድምፅ 2 d ⟶
የፖለቲካ ፓርቲዎች የጋራ ምክር ቤት ዐዲስ ሥራ አስፈጻሚ ሲሰይም የተቃውሞ ድምጾችም ተደምጠዋል Public Domain  —  የኢትዮጵያ ፖለቲካ ፓርቲዎች የጋራ ምክር ቤት ዐዲስ ሥራ አስፈጻሚ መረጠ። አምስት ፓርቲዎች ምርጫውን እንደማይቀበሉ አስታውቀዋል። የጋራ ምክር ቤቱ ቅዳሜ እና እሁድ ባደረገው ጠቅላላ ጉባዔ፣ ዐዲስ የሥራ አስፈጻሚ ኮሚቴ መምረጡን እና የም/ቤቱን መተዳደሪያ ደንብ ማፅደቁን ዋና ጸሐፊው አቶ ደስታ ዲንቃ ተናግረዋል፡፡ ከዚህ ቀደም፣ የሥራ አስፈጻሚው ሥልጣን በማብቃቱ ምርጫ ቦርድ ጉባዔ እንዲጠራ የጠየቁ ስድስት ፓርቲዎች በበኩላቸው፣ ባለፉት ሁለት ቀናት በተካሔደው ጉባዔ የተላለፉ ውሳኔዎችን አንቀበልም ማለታቸውን የኢሕአፓ ተቀዳሚ ምክትል ሊቀመንበር መጋቢ ቢሉይ አብርሃም ኃይማኖት ገልፀዋል፡፡ ዝርዝሩን ከተያያዘው ፋይል ይከታተሉ። ... የአሜሪካ ድምፅ 2 d ⟶
የትራምፕ ካቢኔ ምርጫ ነባራዊውን ሁኔታ ይለውጣል ሲሉ የምክርቤት አባል ተናገሩ Public Domain  — ተመራጩ የዩናይትድ ስቴትስ ፕሬዝዳንት ዶናልድ ትራምፕ የካቢኔ አባላት ምርጫዎች "አወዛጋቢ" መሆናቸውን በዲሞክራቲክ እና በሪፐብሊካን ፓርቲ አባላቶች እየገለጹ ነው። የሕዝብ ተወካዮች ምክርቤት አፈጉባዔ የሆኑት ሪፐብሊካኑ ማይክ ጆንሰን እሁድ እለት ለትችቶቹ በሰጡት ምላሽ፣ የአሜሪካ ሕዝብ ነባራዊውን ሁኔታ ለመለወጥ ድምፅ መስጠታቸውን አስታውሰው፣ አዲሶቹ የካቢኔ አባላት በምክርቤቱ እውቅና ከተሰጣቸው የሚጠብቃቸው ኃላፊነት እሱ መሆኑን ተናግረዋል። የአሜሪካ ድምጿ ቬሮኒካ ባልደራስ በዚህ ዙሪያ ያደረሰችንን ዘገባ፣ከተያያዘው ፋይል ይከታተሉ። ... የአሜሪካ ድምፅ 2 d ⟶
ከሰሜን ጎንደር ዞን አለምዋጭ የስደተኞች ካምፕ አምስት ኤርትራዊያን ስደተኞች በአማራ ክልል የጸጥታ ኅይሎች መታሰራቸው ተገለጠ Public Domain  — በሰሜን ጎንደር ዞን ከሚገኘው የአለምዋጭ የስደተኞች መጠለያ ካምፕ አምስት ኤርትራዊያን ስደተኞች በአማራ ክልል የጸጥታ ሓይሎች መታሰራቸውን ቪኦኤ ያነጋገራቸው እማኞች ተናገሩ፡፡ ኤርትራዊያኑ ስደተኞች ከአለምዋጭ ካምፕ ሁለት ኪሎ ሜትር ርቀት ላይ የምትገኘው ዳባት ከተማ በሚገኝ እስር ቤት ታስረው እንደሚገኙ ተናግረዋል። ለደኅንነቱ ሲባል ስሙ የማይገለጸው ለታሰሩት ስደተኞች ቅርብ የኾነ ምንጭ እንዳለው ስደተኞቹ የተያዙት ባለፈው ሳምንት ማክሰኞ ዕለት ዳባት ከተማ ከሚገኘው የስደተኞች ጉዳይ መሥሪያ ቤት ሲወጡ ነው፡፡ መረጃዎቻቸውን የሚመለከቱ ጉዳዮች ለማጣራት በሚል ወደ ጽሕፈት ቤቱ ተጠርተው ሲወጡ ፖሊስ በቁጥጥር ሥር አውሏቸዋል ሲል ምንጩ አክሎ አመልክቷል፡፡ ለደኅንነቷ ሲባል ስሟ የማይጠቀስ የሌላ ታሳሪ ባለቤት ለቪኦኤ በሰጠችው ቃል ባለቤቷ ባለፈው ሳምንት ረቡዕ ዳባት ውስጥ መታሰሩን ገልጻ በምን ምክንያት እንደታሰረ ለማወቅ ያደረገችው ሙከራ እንዳልተሳካ ተናግራለች፡፡ የእስር ቤቱ ሁኔታ አስከፊ መሆኑን የተናገረው ስሙ እንዳይገለጽ የጠየቀ ስደተኛ በበኩሉ ኢስማኢል አህመድ፣ ፍስሃዬ ኪዳኔ፣ አብዱ አህመዲን፣ መሰረት ገብረስላሴና አታክልቲ ሃይሌ የተባሉ እስረኞች ፍርድ ቤት አለመቅረባቸውን አመልክቷል፡፡ አለምዋጭ የስደተኞች መጠለያ ካምፕ የሚገኝበት የጭላ ቀበሌ አስተዳዳሪ ምናለ ግብነህ ስለስደተኞቹ እስር መረጃ የለኝም ብለዋል፡፡ ሆኖም በሕገ ወጥ የሰው ዝውውር እና ዝርፊያ የመሳሰሉ ወንጀሎች ውስጥ በመሳተፍ ወይም ከአማራ ክልል ለመውጣት በሚደረጉ የተቃውሞ ሰልፍ እንዲካሄድ በመቀስቀስ ተግባር የሚወነጀሉ አንዳንድ ስደተኞች አሉ ብለዋል። የታሰሩት ስደተኞች ከጠቀሷቸው አድራጎቶች ጋራ ግንኙነት አላቸው ወይ? የሚለውን ባለሥልጣኑ ማረጋገጭ አልሰጡም፡፡ የመንግሥታቱ ድርጅት የስድተኞች ኮሚሽን (ዩ ኤን ኤች ሲ አር) በበኩሉ በጽሑፍ በሰጠው ምላሽ "ከአለምዋጭ ካምፕ አምስት ስደተኞች ለስድተኞች እና ለጥገኝነት ጠያቂዎች ያልተፈቀደ እንቅስቃሴ በማድረግ ተወንጅለው መታሰራቸውን እናውቃለን” ብሏል፡፡ ትክክለኛ የፍርድ ሂደት እና የሕግ ጥበቃ እንዲረጋገጥላቸው የኢትዮጵያ የስደተኞች እና ከስደት ተመላሾች አገልግሎትን መጠየቁን ገልጾ ሂደቱን በቅርበት በመከታተል ላይ እንደሚገኝ አስታውቋል፡፡ ከሚመለከታቸው የመንግሥት ባለሥልጣናት ምላሽ ለማግኘት ያደረግነው ሙከራ አልተሳካም፡፡    ... የአሜሪካ ድምፅ 2 d ⟶
በትግራይ ክልል ጊዜያዊ አስተዳደር ስር የሚገኙ አንድ ኃላፊ መኪናቸው ላይ ጥቃት እንደተሰነዘረባቸው ገለጹ  Public Domain  — በትግራይ ክልል ጊዜያዊ አስተዳደር ስር፣ የክልሉ ማዕከላዊ ዞን ዋና አስተዳዳሪ አቶ ሰሎሞን መዓሾ እሁድ ኅዳር 8 ቀን 2017 ዓ.ም. ከአክሱም ወደ መቐለ እየተጓዙ በነበሩበት ወቅት፣ ማይቅነጣል በተባለ አከባቢ በተከፈተባቸው ተኩስ ተሽከርካሪያቸው ላይ ጉዳት መድረሱን ተናገሩ። አቶ ሰሎሞን ጥቃቱ በመኪናቸው ላይ መድረሱና፣ ጉዳቱንም በፎቶ ማስረጃ አስደግፈው እንደያዙት ለአሜሪካ ድምጽ ገልጸው ለተጨማሪ ጥያቄዎቻችን መልስ ከመስጠት ተቆጥበዋል። የማይቅነጣል ወረዳ አስተዳዳሪ አቶ ገብረ ተክለሃይማኖት፣ ጉዳዩን ከወረዳው የጸጥታና ፖሊስ አባላት ማጣራታቸውን ገልፀው፣ “መረጃው ከእውነት የራቀ ነው። የተኮሰበት ሰው የለም” ብለዋል። ከክልሉ ጸጥታ እና ሰላም ቢሮ እንዲሁም የኮምዩኒኬሽን ጽሕፈት ቤት ምላሽ ለማግኝት ያደረግነው ጥረት አልተሳካም።   ... የአሜሪካ ድምፅ 2 d ⟶
በኦሮሚያ እየተካሄደ ባለው ሰልፍ ለቀረበው የሰላም ጥሪ የክልሉ መንግሥትና ታጣቂ ኃይሉ ምላሽ ሰጥተዋል Public Domain  —  በኦሮሚያ ክልል ምስራቅና ምዕራብ ሸዋ፣ ምዕራብና ቄለም ወለጋ፣አርሲ፣ጉጂ ዞኖችና የተለያዩ ወረዳዎች ባለፈው ሳምንት በተካሄዱ ሰልፎች ላይ ለቀረበው የሰላም ጥሪ፣ የክልሉ መንግሥታ የኦሮሞ ነጻነት ሠራዊት ታጣቂዎች የየበኩላቸውን ምላሽ ሰጥተዋል። የክልሉ መንግሥት በፌስቡክ ገጹ ባወጣው የጹሑፍ መግለጫ፣ የሰላማዊ ሰልፍን ጥሪ እንደሚቀበል አስታውቋል። የክልል መንግሥት ቃል አቀባይ አቶ ኃይሉ አዱኛ ሰልፎቹን አስመልክተው፣ መንግሥታቸው የሕዝቡን ጥሪ እንደሚቀበልና በሩ ለሰላም ክፍት መኾኑን ለዝግጅት ክፍላችን በሰጡት አስተያየት ተናግረዋል። ኖርዌይ የሚገኙትና የታጣቂ ቡድኑ አማካሪ መኾናቸውን የሚናገሩት፣አቶ ጅሬኛ ጉደታ የሰላም ጥሪው በትክክለኛ መንገድ በኅብረተሰቡ የቀረበ ነው ብለው እንደማያምኑ ገልጸዋል። "እኛ ኅብረተሰቡም ጥሪ ሳያቀርብልን ራሳች እውነተኛ ሰላም በሀገሪቱ እንድ ሰፍን የበኩላችን እንጥራለን ነገር ግን አንድ ወገን ብቻውን ሰላም ስለፈለገ ብቻ ማምጣት አችልም” ብለዋል። በሁለቱ ቀናት በተካሄዱ ሰልፎች ላይ የተገኙና የአሜሪካ ድምፅ ያነጋገራቸው አንዳንዶቹ ተሳታፊዎች ሰልፉ በመንግሥት አስተባባሪነት እንደተዘጋጀ ሲናገሩ፣ ሌሎች ደግሞ "መንግሥትና ታጣቂው ቡድን ሰላም እንዲያወርዱ ለመጠየቅ በኅብረተሰቡ የተዘጋጀ ነው" ብለዋል። የኦሮሚያ ክልል ኮምዩኒኬሽን ቢሮ ኃላፊ፣ አቶ ኃይሉ አዱኛ "መንግሥት ሰልፉን በማስተባበር ውስጥ እጁ የለበትም" ብለው ነበር። አቶ ጅሬኛ ጉዳታ የሰላም ጥያቄ እያቀረበ ያለው የትኛው የኅብረተሰብ የሚለው ላይ ጥያቄ እንዳላቸው ተናግረዋል። ዝርዝሩን ከተያያዘው ፋይል ይከታተሉ። ... የአሜሪካ ድምፅ 2 d ⟶
አቶ ታዬ ደንዳአ ሁለት የመንግሥት ባለሥልጣናትን በምስክርነት ፍርድ ቤት አቀረቡ Public Domain  — በእስር ላይ ኾነው የቀረበባቸው ክስ በመከታተል ላይ የሚገኙት የቀድሞ የኢትዮጵያ ሰላም ሚኒስትር ደ’ኤታ አቶ ታዬ ደንደኣ፣ ዛሬ ፌደራል ከፍተኛ ፍርድ ቤት በነበራቸው የመከላከያ ምስክር ማስደመጥ ሂደት፣ ሁለት ከፍተኛ የመንግሥት ባለሥልጣናትን በመከላከያ ምስክርነት አቀረቡ። ባለፈው ዓመት ታኅሣሥ 1 ቀን 2016 ዓ.ም. በቁጥጥር ሥር ውለው፣ “የሰላም ሚኒስቴር ደ’ኤታ ኾነው ኢትዮጵያን ለማፍረስ ከሚንቀሳቀሱ ፀረ ሰላም ኀይሎች ጋራ በመተሳሰር ለጥፋት ተልእኮ በኅቡእ ተንቀሳቅሰዋል፤” በሚል ክስ የተመሠረተባቸው አቶ ታዬ ደንዳአ፣ የመከላከያ ምስክሮቻቸውን ቃል ለፍርድ ቤት ማስደመጥ ጀምረዋል። በዛሬ ችሎት፣ ለምስክርነት የቆጠሯቸው፣ የሰላም ሚኒስትር አቶ ብናልፍ አንዱዓለምና የኢትዮጵያ የፌደራል ፖሊስ ምክትል ኮሚሽነር መላኩ ፈንታ ባልቻ፣ አቶ ታዬ የደኅንነት ስጋት እንደነበረባቸው እንደሚያውቁ መስክረዋል። አቶ ታዬ በሕጋዊ መንገድ የጦር መሳሪያ ስለመያዛቸውን ግን እንደማያውቁ ተናግረዋል። ዛሬ በፌዴራል ከፍተኛ ፍርድ ቤት ልደታ ምድብ 1ኛ ሕገ-መንግሥትና- ሕገ-መንግስታዊ ሥርዓት ችሎት፣ የቀረቡት አቶ ታዬ ደንደአ፣ የቆጠሯቸው ሁለት ምስክሮች ያስረዱልኛል ያሉትን የፍሬ ነገር ጭብጥ ለፍርድ ቤቱ አስቀድመው አስረድተው ነበር። አቶ ታዬ “ሕገ ወጥ የጦር መሣርያ በመያዝ” ክስ እንደቀረበባቸው አስታውሰው፣ የተጠቀሰው የጦር መሳሪያ ከታጣቂዎች በእርሳቸውና በቤተሰባቸው ላይ ሊሰነዘር ይችላል ካሉት የግድያ ጥቃት ለመከላከል በመንግሥት ፈቃድ መያዛቸውን ተናግረዋል። ጠቅላይ ሚኒስትር ዐብይ አህመድ ሥልጣን ላይ በመጡበት ዓመት በ2010 ዓ.ም. ሰኔ አካባቢ “ኦነግ ወያኔ” ሲሊ የጠሩት ቡድን አቶ ታዬን ለግድያ እንደሚፈልጓቸው መናገራቸውን፣ አቶ ታዬ ለፍርድ ቤቱ በአስረጅነት አቅርበዋል። አቶ ታዬ አክለው “በ2014 ዓ.ም በከረዩ አባ ገዳዎች ላይ የተፈፀመው ጥቃት በመንግሥት ኃላፊዎች የተቀነባበረ ነው” የሚል አስተያየት በመስጠታቸው ምክር ቤት ውስጥ ሐሳባቸውን እንዳይሰጡ መከልከላቸውን ተናግረዋል። ሦስት ጊዜም “ፖለቲካዊ ግድያ” ሲሉ የጠሩት የግድያ ሙከራ እንደተፈፀመባቸው ለፍርድ ቤቱ አስረድተዋል። በክሱ ላይ የቀረበው “ሕገ ወጥ የጦር መሳሪያ” እራሳቸውንና ቤተሰባቸውን ከአደጋ ለመከላከል በ2015 ዓ.ም የወሰዱት መሳሪያ መኾኑን አስረድተዋል። መጀመርያ የምስክርነት ቃላቸውን ለፍርድ ቤቱ የሰጡት፣ የፌደራል ፖሊስ ምክትል ኮሚሽነር መላኩ ፈንታ ባልቻ፣ አቶ ታዬ ደንደኣ፣ የደኅንነት ችግር እንዳለባቸው ማወቃቸን ገልጸው፣ ነገር ግን ኃላፊነታቸው ከሚንስትር ዝቅ ያለ በመኾኑ ጥበቃ እንዲደረግላቸው ሕግ እንደማይፈቅድ አስረድተዋል። አክለውም፣ በተከሳሹ ቤት ተገኘ ስለተባለው የጦር መሳሪያ የሚያውቁት ነገር እንደሌለ ገልጸዋል። የሰላም ሚኒስትሩ አቶ ብናልፍ አንዷለምም ስለጦር መሳሪያ መታጠቅ ከተከሳሹ ጋራ ያወሩት ነገር እንደሌለ ለፍርድ ቤቱ አስረድተዋል። ሁለቱ ምስክሮች አቶ ታዬ የደኅንነት ስጋት እንደነበረባቸው ብቻ እንደሚያውቁ ገልጸው፣ ምስክርነታቸውን ሰጥተዋል። ዐቃቤ ሕግ ለምስክሮቹ መስቀለኛ ጥያቄን አቅርቧል። የግራ ቀኝ ክርክሩን ሲያደምጥ የቆየው ፍርድ ቤቱም የማጣሪያ ጥያቄዎችን ተይቋል። ፍርድ ቤቱም በቀጣይ፣ ቀሪ ሦስት ምስክሮችን ለማድመጥ ለኅዳር 17 ቀን 2017 ዓ.ም ተለዋጭ ቀጠሮ ሰጥቷል። ከዚህ ቀደም በነበረው ችሎት በቀሪ ምስክሮች ዝርዝር ውስጥ የጠቅላይ ሚኒስትሩና የአዲስ አበባ ከተማ በኃላፊነት መካተታቸው ፍርድ ቤቱ ጠቁመ ነበር። አቶ ታዬ ከዚህ ቀደም በነበራቸው ችሎት ፣ ጠበቃ እንዳይወክላቸው የሀገሪቱ ደህንነት መሥራያ ቤት ጠበቆችን አስፈራርቶብኛል በሚል አቤቱታ ማቅረባቸው ይታወሳል። ዛሬም ችሎት ፊት ቀርበው የተከራከሩት ከጠበቃ ውጪ ነው። /ዝርዝር ዘገባውን ከተያያዘው ፋይል ያድምጡ/ ... የአሜሪካ ድምፅ 2 d ⟶
ዩክሬይን ውስጥ በሩሲያ ጥቃት 11 ሰዎች ሲገደሉ 89 ሰዎች ቆስለዋል Public Domain  — ሩሲያ ሱሚ በተባለች የዩክሬይን ሰሜን ምስራቃዊ ግዛት ባደረሰችው ጥቃት 11 ሰዎች ስትገድል ሌሎች ቢያንስ 89 ሰዎች ማቁሰሏን የዩክሬይን ባለስልጣናት ተናግረዋል፡፡ በጥቃቱ 90 የመኖሪያ ህንጻዎች  እና 28 መኪናዎች፡ ሁለት ትምህርት ተቋማት እና 13 የመሥሪያ ቤት ህንጻዎች  መጎዳታቸውን የዩክሬይን ባለስልጣናት ተናግረዋል፡፡ ትላንት እሁድም ሩሲያ በዩክሬይን የኃይል ማመንጫ መሠረተ ልማት ላይ ከባድ የቦምብ ድብደባ አድርሳለች፡፡ ይህ በዚህ እንዳለ ዩናይትድ ስቴትስ ዩክሬይን በረጅም ርቀት ተኳሽ የጦር መሣሪያዎቿ ሩስያ ግዛት ውስጥ ያሉ ወታደራዊ ኢላማዎችን እንድታጠቃ ፈቅዳለች የሚሉ የዜና ዘገባዎች በትላንትናው እለት ተሰራጭተዋል፡፡ ሩስያ  ጦርነቱን አጠናክራ ለመቀጠል አስራ ሁለት ሺህ ሰሜን ኮሪያዊያን ወታደሮችን ማሰለፏን ተከትሎ ፕሬዚደንት ጆ ባይደን ዩክሬን ዩናይትድ ስቴትስ በሰጠቻት  ረጅም ርቀት ተተኳሽ መሳሪያዎች  እንድትጠቀም መፍቀዳቸውን አንድ የዩናይትድ ስቴትስ ባለስልጣን እና ሊሎች ስለጉዳዩ የሚያውቁ ሦስት ሰዎች ዋቢ አድርጎ አሶሲየትድ ፕሬስ ዘግቧል፡፡ ካሁን ቀደም ባይደን የዩክሬይኑን ጦርነት በይበልጥ መቀጣጠል ሲቃወሙ ቆይተዋል፡፡ ፑቲን በበኩላቸው የኔቶ አባል ሀገር ለዩክሬይን የሩሲያን ግዛት በጦር መሣሪያዎቹ እንድታጠቃ ቢፈቅድ እኛም ሌሎች አካላት ምዕራባዊያን ኢላማዎችን የሚመቱበት የረጅም ርቀት ተተኳሽ መሣሪያ ልንሰጥ እንችላለን ብለው እንደነበረ ይታወሳል፡፡     ... የአሜሪካ ድምፅ 2 d ⟶
ራማፎሳ ማዕድን ማውጫ ውስጥ የተቀበሩ ሰዎችን ለማውጣት ርብርብ እንዲደረግ ተማጽኖ አቀረቡ Public Domain  — በፖሊሶች እና በህገወጥ መንገድ ማዕድን በሚቆፍሩ ሰዎች መካከል በተፈጠረው ፍጥጫ ምክኒያት መውጫ ያጡት ቆፋሪዎች ህይወት አደጋ ላይ መውደቅ የለበትም ሲሉ የደቡብ አፍሪካ ፕሬዚደንት ሲሪል ራማፎሳ አሳሰቡ፡፡ ማዕድን ቆፋሪዎች ደህንነታቸው ተጠብቆ መውጣት አለባቸው ሲሉ ፕሬዚደንቱ አሳስበዋል፡፡ በደቡብ አፍሪካ ሰሜን ምዕራብ ክፍለ ግዛት የተራረፈ ወርቅ ፍለጋ በመቶዎች የተቆጠሩ ቆፋሪዎች የተዘጋ ጉድጓድ ውስጥ በህገ ወጥ መንገድ የገቡ ሲሆን ፖሊሶች ሲወጡ ለመያዝ ምግብ እና ውሃ እንዳይገባላቸው ከልክለዋል፡፡  ህገወጥ የማዕድን ቁፋሮ ደቡብ አፍሪካን የወረሳት ችግር ሲሆን ባለፉት ሳምንታት ከአንድ ሺህ የሚበልጡ ህገ ወጥ ማዕድን ፈላጊዎች ከማእድን ጉድጓዶች ውስጥ ወጥተዋል፡፡ ሆኖም ባለፈው ሳምንት የሀገሪቱ ፖሊሶች አሁንም ያልወጡ በመቶዎች የሚቆጠሩ ሊኖሩ እንደሚችሉ ተናግረዋል፡፡ ምግብ እና ውሃ እንዳይደርሳቸው መደረጉን የአካባቢው ነዋሪዎች እና የሰብዓዊ መብት ተሟጋቾች ነቅፈዋል፡፡ ሁኔታው ብጥብጥ ሊቀሰቅስ የሚችል መሆኑን የተናገሩት ራማፎሳ ፖሊሶች ወንጀለኞችን ሳያመልጡ ለመያዝ የተከተሉት አግባብ ያለው አሰራር ቢሆንም ሰዎቹን ህይወታቸው አደጋ ላይ ሳይወድቅ ከጉድጓዱ ለማስወጣት ፖሊስ ኅላፊነቱን ይወጣል ብለዋል፡፡  ማዕድን ቆፋሪዎቹ የቀሩት ለመውጣት ባለመቻላቸው ይሁን ፈቃደኛ ባለመሆናቸው እንደሆን አልታወቀም፡፡  ... የአሜሪካ ድምፅ 2 d ⟶
የቤይሩት የአየር ጥቃት ተከትሎ የቤይሩት ት/ቤቶች ተዘግተዋል Public Domain  — በሊባኖስ ዋና ከተማ ቤይሩት ማዕከላዊ አካባቢ ትላንት በደረሱት የአየር ጥቃቶች የሄዝቦላ ዋና ቃል አቀባዩን ጨምሮ ስድስት ሰዎች መገደላቸውን ተከትሎ ዛሬ ሰኞ የከተማዋ ትምህርት ቤቶች መዘጋታቸው ተዘግቧል፡፡ በጥቃቶቹ ምክንያት የትምህርት ሚንስቴሩ ቤይሩት ውስጥ የሚገኙ ትምህርት ቤቶች እና የከፍተኛ ትምህርት ተቋማት ለሁለት ቀናት እንዲዘጉ መወሰኑ ተገልጿል፡፡ ራስ አል ናባ በተባለው የቤይሩት አካባቢ የሄዝቦላ ቃል አቀባይ መሐመድ አፊፍ እና ሌሎች ሦስት ሰዎች መገደላቸውን ሄዝቦላ እና የእስራኤል የጦር ኅይል አስታውቀዋል፡፡ እስራኤል ለወትሮው ግልጽ የሆነ ወታደራዊ ሚና የሌላቸውን የሄዝቦላ ከፍተኛ ባለስልጣናት አዘውትራ ኢላማ የማታደርግ ሲሆን በአየር ጥቃቶቿም በአብዛኛው የምታነጣጥረው ሄዝቦላ ታጣቂዎች በብዛት የሚገኙባቸውን የቤይሩት ደቡባዊ ዳርቻ ሰፈሮችን መሆኑን ሮይተርስ በዘገባው አመልክቷል፡፡ ሆኖም የእስራኤል የመከላከያ ኃይሎች ባወጣው መግለጫ የሂዜቦላ ቃል አቀባዩን የገደለው ላይ ጥቃት ደንበኛ የስለላ መረጃ ተመሥርቶ የተወሰደ እርምጃ ነው ብሏል፡፡ ይህ በእንዲህ እንዳለ ጋዛ ካን ዩኒስ ውስጥ እስራኤል በተፈናቃዮች መጠለያ ድንኳን ላይ ዛሬ ሌሊት ባደረሰችው ጥቃት ሁለት ሕጻናት እና ወላጆቻቸውን መግደሏን የፍልስጥኤም ባለስልጣናት አመልክተዋል፡፡ የጋዛ ህዝባዊ መከላከያ ተቋም ትላንት እሁድ ባወጣው መግለጫ እስራኤል "ቤት ላህላ" በተባለ ሰፈር የሚገኝ የመኖሪያ ህንጻ ላይ ባደረሰችው የአየር ድብደባ ህጻናት ጨምሮ ሠላሳ አራት ሰዎች መግደሏን አመልክቶ ብዛት ያላቸው ሰዎች ያሉበት ሁኔታ አለመታወቁን   አመልክቷል፡፡ ... የአሜሪካ ድምፅ 2 d ⟶
ባይደን አማዞን ደንን በመጎብኘት የአየር ንብረት ለውጥ ትግል ቅርሳቸውን አከበሩ Public Domain  — ትላንት እሁድ በብራዚል ታሪካዊ ጉብኝት ያደረጉት የዩናይትድ ስቴትስ ፕሬዚደንት ጆ ባይደን በአስተዳደር ዘመናቸው የአማዞን ደንን የጎበኙ የመጀመሪያው የአሜሪካ ፕሬዚደንት ሆነዋል፡፡ ጉብኝታቸውን ኋይት ሀውስ ፕሬዚደንቱ የአየር ንብረት ለውጥን በመታገል ያበረከቱት ክንዋኔ ታሪክ የተከበረበት ጉዞ ሲል ገልጾታል፡፡ ትላንት ከዓለም ግዙፉ የአማዞን ደን መግቢያ ላይ የሚገኘው አማዞኒያ ክፍለ ግዛት ዋና ከተማ ማናዉስ   የገቡት ባይደን በርሳቸው አስተዳደር ዩናይትድ ስቴትስ ለዓለም አቀፉ የአየር ንብረት ለውጥ ፋይናንስ በየዓመቱ 11 ቢሊዮን ዶላር ለመስጠት ያላትን ግብ አሳክታ ማለፏን አመልክተዋል፡፡ ባይደን በንግግራቸው ዓለማችንን ለመጠበቅ የምናደርገው ትግል ለቀጣይ ተውልዶች የሚተርፍ ትግል ነው ያሉት ጆ ባይደን  "ይህ  በሀገሮቻችንን በጠቅላላ  እና በሰው ዘር በሙሉ ላይ  የተጋረጠ ብቸኛው የህልውና አደጋ  ሊባል ይችላል"  ብለዋል፡፡ የአማዞኒያ ዋና ከተማ   ማናዉስ የምትገኘው የእስያ ፓሲፊክ የኢኮኖሚ ጉባኤ አስተናጋጅ በሆነቸው በፔሩ ዋና ከተማ ሊማ እና የቡድን ሃያ የመሪዎች ጉባኤ አስተናጋጇ ሪዮ ዲ ጃኒየሮ መሃል ሲሆን የዩናይትድ ስቴትሱ ፕሬዚደንት ባደረጉት አጭር ቆይታ ዩናይትድ ስቴትስ ለበርካታ የአየር ንብረት መርሓ ግብሮች የመደበቻቸውን ወጪዎች ይፋ አድርገዋል፡፡ ለአማዞን ደን ጥበቃ ፈንድ 50 ሚሊዮን ዶላር መመደቡን አስታውቀዋል፡፡ ከአካባቢው ነባር ማህበረሰቦች መሪዎች ጋር የተወያዩት ባይደን ደኑን በሄሊኮፕተር እየተዘዋወሩ ጎብኝተዋል፡፡ በኤፔክ እና ቡድን ሃያ ጉባኤ ላይ የተገኙ እና ማንነታቸው እንዳይገለጽ የጠየቁ በርካታ የዲፕሎማሲ ምንጮች በቀጣዩ የፕሬዚደንት ዶናልድ ትረምፕ አስተዳደር ዩናይትድ ስቴትስ የአየር ንብረት ጉዳዮችን በሚመለከት የምታደርጋቸው ጥረቶች በእጅጉ መቀነሳቸው አይቀርም የሚል ስጋት እንዳላቸው ተናግረዋል፡፡    ... የአሜሪካ ድምፅ 2 d ⟶
በወሲባዊ ውዝግብ የተጠመዱት ሁለቱ የተመራጩ ፕሬዝደንት እጩ ተሿሚዎች Public Domain  — በተመራጩ የዩናይትድ ስቴትስ ፕሬዝደንት ዶናልድ ትረምፕ ከታጩት ዋና ዋና የካቢኔ ተሿሚዎች መካከል ሁለቱ   ከወሲባዊ ውንጀላዎች ጋራ በተያያዙ ውዝግቦች የተጠመዱ መሆናቸው ተመልክቷል፡፡ ትረምፕ ለመከላከያ ሚንስትርነት ያጯቸው የቀድሞው የፎክስ ኒውስ ቴሌቭዥን አቅራቢ ፒት ሄግሴት እና ጠቅላይ ዐቃቤ ሕግ እንዲሆኑ የመረጧቸው የቀድሞው የዩናይትድ ስቴትስ ምክር ቤት አባል ማት ጌትዝ ከወሲባዊ አድራጎት ውንጀላዎች ጋራ በተያያዙ ውዝግቦች የተጠመዱ ሲኾኑ ሹመታቸው በሕግ መወሰኛው ምክር ቤት መጽደቅ ላይ እክል ሊፈጥር እንደሚችል ተመልክቷል፡፡ ለመከላከያ ሚንስትርነት የታጩት የአርባ አራት ዓመቱ ፒት ሄግሴት እ.አ.አ በ2017 ዓ.ም በወሲባዊ ጥቃት ለወነጀለቻቸው ሴት መጠኑ ያልተገለጸ ገንዘብ መክፈላቸውን በሳምንቱ መጨረሻ ጠበቃቸው ቲም ፓርላቶር ገልጸው መሠረተ ቢስ ያሉት ውንጀላ አደባባይ እንዳይወጣ ለመከላከል መሆኑን አስረድተዋል፡፡ የአርባ ሁለት ዓመቱ ማት ጌትዝ ደግሞ በተወካዮች ምክር ቤት አባልነት አራተኛቸው የሆነውን የሁለት ዓመት ዘመን እያጠናቀቁ ሳሉ   ባለፈው ሳምንት በድንገት ሥራቸውን ለቀዋል፡፡ ጌትዝ ከምክር ቤት አባልነት የለቀቁት ከአስራ ሰባት ዓመት ልጃገረድ ጋራ ወሲባዊ ግንኙነት በመፈጸም እና በድብቅ ሱስ አስያዥ መድሃኒቶች በመውሰድ በቀረቡባቸው ውንጀላዎች ዙሪያ የምክር ቤቱ የሥነ ምግባር ኮሚቴ የከፈተውን ምርምራ ሊያጠናቅቅ ጥቂት ቀናት ሲቀሩት መሆኑ ተመልክቷል፡፡ አንዳንድ የምክር ቤቱ አባላት ጌትዝ በወሲባዊ ድርጊት በተሰማሩባቸው ሁኒታዎች ራቁት የተነሱ ፎቶዎችን ምክር ቤቱ አዳራሽ ውስጥ ለሰዎች ሲያሳዩ ነበር ብለው ተናግረውባቸዋል፡፡ ጌትዝ ክሱን ያስተባበሉ ሲሆን የፊዴራል መንግሥት ባለሥልጣናትም ክስ እንደማይመሰርቱባቸው በዚሁ ዓመት አስታውቀው እንደነበር አይዘነጋም፡፡ የፒት ሃግሴት ጠበቃ በበኩላቸው ካሊፎርኒያ ውስጥ ከተካሄደ የሪፐብሊካን ፓርቲ የሴቶች ዝግጅት በኋላ በሆቴል ክፍላቸው ከሴቲቱ ጋራ የነበረው ወሲባዊ ግንኙነት የተፈጸመው በሁለቱም ፍላጎት ነው ብለዋል፡፡ ... የአሜሪካ ድምፅ 2 d ⟶
ብሪታኒያ በሱዳን ጉዳይ የፀጥታ ምክር ቤት አባላትን እገዛ ልትጠይቅ ነው Public Domain  — የሱዳን ተፋላሚ ወገኖች ውጊያው አቁመው የርዳታ አቅርቦት እንዲገባ እንዲፈቅዱ የጠየቀችው ብሪታኒያ የተቀሩት የመንግሥታቱ ድርጅት የፀጥታ ምክር ቤት አባላትን ድጋፍ እንደምትጠይቅ የውጭ ጉዳይ ሚንስቴሯ አስታውቋል፡፡ ብሪታኒያ የወቅቱ የምክር ቤቱ ተረኛ ፕሬዝደንት ናት። ዛሬ ሰኞ የምክር ቤቱን ስብሰባ በሊቀመንበርነት የሚመሩት የውጭ ጉዳይ ሚንስትሯ ዴቪድ ላሚ ሀገራቸው ና ሲየራሊዮን በጋራ ያቀረቡት ረቂቅ ውሳኔ ላይ ድምጽ ያሰጣሉ፡፡ ውሳኔው ከርዳታ አቅርቦት መግባት ሌላ ለሲቪሎች ደህንነት ጥበቃ እንዲሰጥም ይጠይቃል፡፡ ሚንስትሩ ብሪታኒያ ሱዳን እንድትረሳ እንደማትፈቅድ እና ርዳታዋንም በእጥፍ በማሳደግ ወደ285 ሚሊዮን ዶላር ከፍ እንድምታደርግ እንደሚያስታውቁ መግለጫው አመልክቷል፡፡ የውጭ ጉዳይ ሚንስትሩ ዴቪድ ላሚ ከዚህ በተጨማሪ እስራኤል ወደጋዛ የሚላከውን የሰብዓዊ ረድዔት አቅርቦት መገደቧን እንደሚነቅፉ መግለጫው አውስቶ በአስቸኳይ ተኩስ አቁም እንዲደረግ ታጋቾቹ በሙሉ እንዲለቀቁ ይጠይቃሉ ብሏል፡፡ ዩክሬይንን በተመለከተም ሩስያ ያለው ዕውነታ እስከሚገባት ብሪታኒያ ከዩክሬን ጋር መቆሟን እንደምትቀጥል እንደሚናገሩ መግለጫው አመልክቷል፡፡ ... የአሜሪካ ድምፅ 2 d ⟶
የሶማሊያው ሚኒስትር ለአውሮፓ ዲፕሎማቶች ከባድ ማስጠንቀቂያ ላኩ Public Domain  — የሶማሊያ የውጭ ጉዳይ ሚኒስትር  በቅርቡ በሶማሌላንድ ምርጫ ላይ አስተያየት ለሰጡ  በሀገሪቱ ለሚገኙ የአውሮፓ ዲፕሎማቶች ከባድ ማስጠንቀቂያ ላኩ። አህመድ ሙአሊም ፊቂ ባለፈው ሳምንት የተካሄደውን ምርጫ የታዘቡ የአውሮፓ ሀገራት አምባሳደሮች ሶማሌላንድን እንደ አንድ የተለየ ሀገር ሳይሆን እንደ ሶማሊያ አንድ ክልል መጥራት እንዳለባቸው ተናግረዋል። ፊቂ በሶማሊያ የዴንማርክ አምባሳደር ስቲን ሶን አንደርሰንን በሶማሌላንድ ሃርጌሳ በነበሩበት ወቅት ስለ ሰጡት አስተያየት ለማነጋገር እንዳስጠሯቸው ገልጸዋል። የሶማሊያ የውጭ ጉዳይ ሚኒስቴር በጻፈው ደብዳቤ አንደርሰን በአውሮፓዊያኑ ህዳር 19 በሚኒስቴር መስሪያ ቤቱ እንዲቀርቡ ተነግሯቸዋል። የሶማሌላንድ የማስታወቂያ ሚኒስትር አሊ ሀሰን መሀመድ የፊቂን እርምጃ  “ምቀኝነት” ሲሉ ተችተዋል። አሊ ፊቂን “በሶማሊላንድ ህዝብ እድገት ምክንያት ቅናት አድሮባቸዋል” ሲል ከሰዋል። ይህ በእንዲህ እንዳለ የሶማሌላንድ ፕሬዚዳንታዊ ምርጫ የዓለም አቀፍ የምርጫ ታዛቢ ቡድን (IEOM) በሶማሊላንድ ውስጥ ስላለው ምርጫ ያዘጋጀውን ግምገማ አትሟል። ምርጫው የተመዘገቡ መራጮች  የመምረጥ መብታቸውን መተግበር እንዲችሉ ባስቻለ  በአብዛኛው የተረጋጋና ሰላማዊ በሆነ ሁኔታ መከናወኑን ታዛቢዎቹ ተናግረዋል። ምንም እንኳን የምርጫ ታዛቢዎቹ  በተሻለ ስልጠና ሊፈቱ የሚችሉ የአሰራር እና የአስተዳደር አለመጣጣም እንከኖችን ቢያስተውሉም ፣ ምንም አይነት ከባድ የህግ ጥሰት ወይም የምርጫ ብልሹ አሰራሮችን  እንዳልተመለከቱ ተናግረዋል። የሶማሌላንድ ምርጫ ኮሚሽን የቀደሙት ውጤቶችን ከአውሮፓዊያኑ ህዳር 21 በፊት ይፋ ያደርጋል ተብሎ ይጠበቃል ።   ... የአሜሪካ ድምፅ 3 d ⟶
ርዕሰ ሊቃነ ጳጳሳት ፍራንሲስ እስራኤል በጋዛ ያደረሰችው ጥቃት 'የዘር ማጥፋት' ስለመሆኑ ለማጣራት ምርመራ እንዲደረግ ጠየቁ Public Domain  — የካቶሊክ ቤተ ክርስቲያን ርዕሰ ሊቃነ ጳጳሳት ፍራንሲስ ፣ እስራኤል በጋዛ ያደረሰችው ጥቃት ዘር ማጥፋት መሆኑን ለማረጋገጥ ምርመራ እንዲደረግ ጥሪ አቀረቡ ።ይህ ይፋ የተደረገው ከርዕሠ ሊቃነ ጳጳሳቱ ኢዮቤልዩ በዓል አስቀድሞ እንደሚለቀቅ ከተነገረለት አዲስ መጽሐፍ ላይ ቀድመው በወጡ ቅንጫቢ አንቀጾች ላይ ነው። ርዕሰ ሊቃነ ጳጳሳት ፍራንሲስ እስራኤል በጋዛ ሰርጥ በወሰደችው እርምጃ ጋር ተያይዞ ባለው የዘር ማጥፋት ውንጀላ ዙሪያ ማጣሪያ እንዲደረግ ሲያሳስቡ ይህ የመጀመሪያቸው ነው። በአውሮፓዊያኑ መስከረም ላይ እስራኤል በጋዛ እና ሊባኖስ ያደረሰችው ጥቃት “የሞራል ህግ የጣሰ” ፣ ተመጣጣኝ ያልሆነ መሆኑን እንዲሁም የእስራኤል ወታደሮች ከጦርነት ህግጋት እንተደተሻገሩ ተናግረዋል። በሄርናን ሬይስ አልካይድ የተዘጋጀው እና ከጳጳሱ ጋር በተደረገ ቃለ ምልልስ ላይ የተመሰረተው መፅሃፍ “ተስፋ ፣ ተስፋ አይቆርጥም። መንፈሳዊ ፍኖት ወደ ተሻለ ዓለም" የሚል ርዕስ ሲኖረው ፣ ከጳጳሱ የአውሮፓዊያኑ 2025 ኢዮቤልዩ በዓለ ሲመት በፊት የፊታችን ማክሰኞ ይለቀቃል። ርዕሰ ሊቃነ ጳጳሳት ፍራንሲስን አንድ ዓመት የሚዘልቅ ኢዮቤልዩ በዓል በማስመልከት ከ30 ሚሊዮን በላይ ምዕመናንን ወደ ሮም ያመጣል ተብሎ ይጠበቃል። "አንዳንድ ባለሙያዎች እንደሚናገሩት በጋዛ ውስጥ የተፈጸመው ድርጊት የዘር ማጥፋት ባህሪያት አሉት " ሲሉ ጳጳሱ መናገራቸውን ፣ የመጽሃፉን ቅንጭብ ዋቢ ያደረገው ፣ ዛሬ ለንባብ የበቃው የጣሊያን ዕለታዊ ጋዜጣ ላ ስታምፓ ዘግቧል። "በህግ ባለሙያዎች እና በዓለም አቀፍ አካላት ከተቀረጹት ልዩ ፍቺዎች ጋር የሚስማማ መሆኑን ለማረጋገጥ በጥንቃቄ መመርመር አለብን" ሲሉም አክለዋል። ባለፈው ዓመት ርዕሳነ ሊቀ ጳጳስ ፍራንሲስ በጋዛ ከነበሩ የእስራኤል ታጋቾች እና በጦርነቱ ውስጥ ከሚኖሩ ፍልስጤማውያን ዘመዶች ጋር በተናጥል የተገናኙ ሲሆን ፣ የቫቲካን ዲፕሎማቶች ከመጠቀም የሚታቀቧቸውን “ሽብርተኝነት” እና እንደ ፍልስጤማዊያኑ ሁሉ “የዘር ማጥፋት” የሚሉትን ቃላት በመጠቀማቸው የጋለ ክርክር ቀስቀሰዋል። ባለፈው ሳምንት ከእስር ከተፈቱት የእስራኤል ታጋቾች ልኡካን እና ጫና ሲፈጥሩ ከቆዩ ቤተሰቦቻቸው ጋር የተገናኙት ሊቀ ጳጳሱ በቅርቡ በሚለቀቀው መጽሃፍ ላይ የኤዲቶሪያል ቁጥጥር አላቸው። ጦርነቱ የጀመረው የታጣቂው የሃማስ ቡድን በአውሮፓዊያኑ ጥቅምት 7፣ 2023 እስራኤልን ካጠቃ በኃላ ሲሆን ፣ በወቅቱ 1,200 ሰዎች ገድሎ 250 ሰዎችን አሁንም የተወሰኑት ወደ ሚገኙበት ጋዛ አፍኖ ወስዷል ። በጋዛ የጤና ባለስልጣናት መረጃ መሰረት ፣ የእስራኤል ዓመት የተሻገረ ወታደራዊ ዘመቻ ከ 43,000 በላይ ሰዎችን ገድሏል ። ምንም እንኳን ከሟቾቹ ውስጥ ከግማሽ በላይ የሚሆኑት ሴቶች እና ህጻናት ናቸው ። መረጃው በሲቪሎች እና በተዋጊዎች መካከል ልዩነትን አላስቀመጠም (AP)። ... የአሜሪካ ድምፅ 3 d ⟶
ትራምፕ የነዳጅ ኢንዱስትሪ ሥራ አስፈፃሚን ለኃይል መስሪያ ቤቱ ጸሐፊነት መረጡ Public Domain  — በቅርቡ ስልጣን የሚረከቡት  ዶናልድ ትራምፕ አዲሱን አስተዳደራቸውን እያዋቀሩ በሚገኙበት በአሁኑ ወቅት ፣ የነዳጅ መስክ አገልግሎት ድርጅት መስራች የሆኑት  ክሪስ ራይትን የ ዩናእትድ ስቴትስን  የኃይል መስሪያቤት እንዲመሩ መርጠዋል። የሽግግር ቡድኑ የፕሬዚደንቱን ምርጫ  ቅዳሜ ከሰዓት በኃላ ይፋ አድርጓል ። አርብ እለት ትራምፕ  ፣ የአገር ውስጥ ጉዳይ መስሪያቤትን እንዲመሩ በመረጧቸው  የቀድሞው የሰሜን ዳኮታ ግዛት አስተዳዳሪ  ዳግ በርገም የሚመራ አዲስ ብሔራዊ የኃይል ምክር ቤት ይፋ አድርገዋል። በአዲሱ ኃላፊነታቸው መሰረት በርገም በኃይል ማመንጨት ፍቃድ ፣ምርት ፣ ስርጭት ፣ቁጥጥር እና ማጓጓዝ ላይ የሚሳተፉትን  ሁሉንም አስፈፃሚ ቅርንጫፍ ተቋማት የሚያካልል  ቡድንን እንደሚመሩ   ትራምፕ በመግለጫቸው አስታውቀዋል ። የብሔራዊ  ኃይል  ምክር ቤት ሊቀመንበር እንደመሆናቸው ፣ በርገም  በብሔራዊ ደህንነት ምክር ቤቱም መቀመጫ  እንደሚኖራቸው  ተመራጩ ፕሬዝዳንት ተናግረዋል። ራይት ፣ ኮሎራዶ ላይ መሰረት ያደረገው ፣ ሊበርቲ ኢነርጂ የተሰኘ ኩባንያ ዋና ኃላፊ ቢሆኑም ፣ የፖለቲካ ልምድ ግን የላቸውም ። ነዳጅ ማመንጨትን  ጨምሮ ለነዳጅ ዘይት እና ጋዝ ኢንዱስትሪ ተሟጋች በመሆናቸውም ይታወቃሉ። በአውሮፓዊያኑ  2019 ፣ አደገኛ አለመሆኑን ለማሳየት ፈሳሽ ነዳጅ እስከመጠጣት ደርሰዋል ። በመጋቢት 2024 የአውሮፓዊያኑ ዘመን ይፋ የተደረገው የአሜሪካ  ኃይል መረጃ አስተዳደር ሪፖርት እንደሚያሳየው ፣ ሀገሪቱ ላለፉት ስድስት ተከታታይ ዓመታት  በማንኛውም ጊዜ ከማንኛውም ሀገር የበለጠ ድፍድፍ ዘይት አምርታለች። ወርሃዊ የአሜሪካ ድፍድፍ ዘይት ምርት መጠን በአውሮፓዊያኑ ታህሳስ 2023 ከ13.3 ሚሊዮን በርሜል የደረሰ ሲሆን ፣ ይህም በወረሃዊው የምርት መጠን ልኬት  ከፍተኛው  ሆኖ ተመዝግቧል(AP)።  ... የአሜሪካ ድምፅ 3 d ⟶
በጋቦን ወታደራዊውን አገዛዝ ለማስወገድ አብላጫ መራጮች ድምጻቸውን መስጠታቸውን የቀደሙ ዘገባዎች አመላከቱ Public Domain  —  በጋቦን የተከናወነው ህዝበ ውሳኔ ቀደምት ውጤቶች  ፣ከተመዘገቡት 860,000 መራጮች አብዛኛው  ወታደራዊ አገዛዝን የሚቋጨውን  አዲስ ሕገ መንግሥት ለመደገፍ ድምጽ መስጠታቸውን የሀገሪቱ መንግሥት ቴሌቪዥን ጣቢያ  ዘገባዎች አመልክተዋል። የቅዳሜው ህገ-መንግስታዊ ህዝበ ውሳኔ ውጤት ፣ ለ60 ዓመታት በሀገሪቱ ውስጥ የቆየውን የቦንጎ ቤተሰብ ስርወ መንግስት ያስወገደውን የሽግግር ወታደራዊ መንግስት  ዘመን ሊደመድም ይችላል። ይፋዊ የቆጠራ ውጤቱ በቅርቡ ይፋ ይሆናል ይጠበቃል። ባለስልጣናት እንደሚሉት ፣ የአዲሱ ህገ መንግስት መጽደቅ ፣ በአውሮፓዊያኑ  ነሐሴ 30 የጋቦን መሪዎች ካለ ደም መፋሰስ ፣ የመካከለኛው አፍሪካዊቷን ሀገር ከፖለቲካ ባርነት ነጻ እንዳረገ በሚናገሩለት መፈንቅለ መንግስት ስልጣን የተቆጣጠሩት ፣ ጄኔራል ብሪስ ክሎቴር ኦሊጊ ንጊዩሜ ከገቧቸው  ዐበይት ቃል ኪዳኖች መካከል አንዱ ነው።   ሰርጌ ዜንግ አንጎ የጋቦን ዜጎች በህዝበ ውሳኔው ወቅት አዲስ ህገ-መንግስት እንዲፀድቁ የምርጫ ቅስቀሳ ያደረጉ የፖለቲካ ፓርቲ የብሔራዊ ህብረት  ስራ አስፈፃሚ ናቸው። አዲሱ ሕገ መንግሥት እንደ ቦንጎ ዘመን ሥልጣን ከአባት ወደ ልጅ የሚተላለፍበትን ሌላኛ የፖለቲካ ሥርወ መንግሥት(ውርርስ)  ማንኛውንም ዕድል እንደሚገታ ተናግረዋል። ነገር ግን ተቃዋሚዎች እና ሲቪል ማህበረሰቦች የሕገ መንግሥቱ ረቂቅ ወታደራዊው ገዥ ጄኔራል ንጉዌማን ለፕሬዚዳንትነት እንዳይወዳደሩ መከልከል ነበረበት ብለዋል።  በወታደራዊ አመራሮች  ህገ መንግስቱ የተዘጋጀው  ለፕሬዚዳንቱ ከልክ ያለፈ ስልጣን ለመስጠት ፣  ንጉዌማ በስልጣን ላይ እንዲቆዩ  ለማድረግ እንደሆነም አክለዋል። የጋቦን ተቃዋሚዎች እና የሲቪል ማህበራት የህዝበ ውሳኔውን ውጤት በፍርድ ቤት እንደሚቃወሙ ቢናገሩም ተጨማሪ ዝርዝር መግለጫ አልሰጡም። የጋቦን መንግስት የቅዳሜው ህዝበ ውሳኔ ነፃ፣ ፍትሃዊ እና ግልጽ ነበር ብሏል። አዲሱ ህገ መንግስት ከቦንጎ የአባት እና ልጅ የስልጣን  ዘመን በተለየ የግለሰቦችን ነፃነት ያስከብራል ሲሉ ባለስልጣናት ተናግረዋል። የአፍሪካ ህብረት እና የመካከለኛው አፍሪካ ምጣኔ ሀብት  እና የገንዘብ ማህበረሰብ ፤ዓለም አቀፍ ታዛቢዎች እንደተናገሩት የምርጫ ጣቢያዎች ዘግይተው በመከፈታቸው ዘግይቶ  ከተጀመረው ድምጽ አሰጣጥ ሂደት  ምርጫው ሰላማዊ እና ግልፅነት የተሞላበት ነበር። የህዝበ ውሳኔው ውጤት ውጤት ይፋ ከሆነ  በኋላ ፣ ጋቦን በየካቲት ወር የምርጫ ህጎቿን በማዘጋጀት ፣ የምርጫ አስተዳደር አካልን ትፈጥራለች ተብሎ ይጠበቃል ።  በነሐሴ 2025 የአውሮፓዊያኑ ዘመን ደግሞ ሁለት አመት ያስቆጠረውም ሽግግር ጊዜ  ለመቋጨት  ፕሬዚዳንታዊ፣ የፓርላማ እና የአካባቢ ምርጫዎችን ታከናውናለች። ወታደራዊው ገዥ ንጉሜ  ለወደፊቱ በሚደረጉ ምርጫዎች ላይ ዕጩ ስለመሆናቸው ይፋ ባያደርጉም በዚህ ህዝበ ውሳኔ ላይ ያለው ህገ መንግስት ግን ለፕሬዚዳንትነት ከመወዳደር አይከለክላቸውም። ... የአሜሪካ ድምፅ 3 d ⟶
የቀድሞ የከባድ ሚዛን ሻምፒዮን ማይክ ታይሰን በጃክ ፖል ተሸነፈ  Public Domain  — ትላንት ምሽት በቴክሳስ በተካሄደውና የቀድሞው ታዋቂ ቦክሰኛ ማይክ ታይሰንን በድጋሚ ወደ ቀለበት በመለሰው የከባድ ሚዛን ፍልሚያ ጃክ ፖል በነጥብ አሸናፊ ሁኗል፡፡  የ27 አመቱ የማህበራዊ ሚዲያ ተፅእኖ ፈጣሪ ሽልማት አሸናፊው ፖል እና በ58 አመቱ የቀድሞ የከባድ ሚዛን ሻምፒዮን ታይሰን መካከል የተደረገውን ፍልሚያ በአርሊንግተን በሚገኘው AT&T ስታዲየም በርካታ ተመልካቾች ታድመውበታል፡፡ በኔትፍሊክስም ፍልሚያው በቀጥታ ስርጭት ተላልፏል፡፡   በፍልሚያው ፖል ተፋላሚው ማይክ ታይሰን ላይ 78 ቡጢዎችን ያሳረፈ ሲሆን ታይሰን በበኩሉ  18 ቡጢዎችን ብቻ ተጋጣሚው ላይ ማሳረፍ መቻሉ ተገልጿል፡፤   "በመጀመሪያ ደረጃ ማይክ ታይሰን - እሱ ጋር መፋለም መቻሌ ለእኔ ክብር ነው" ሲል ፖል ከፍልሚያው በኋላ ተናግሯል።  የጉልበት መከላከያ ለብሶ ፍልሚያውን ያደረገው ማይክ ታይሰን ከውድድሩ በኋላ የእግር ጉዳት እንደነበረበት ገልጿል ነገር ግን ለውድድሩ ይህንን ምክንያት ማድረግ አልፈልግም ሲልም ተናግሯል፡፡   በ1980ዎቹ መገባደጃ እና በ1990ዎቹ መጀመሪያ ላይ እጅግ አስፈሪ የከባድ ሚዛን ሻምፒዮኖች አንዱ የነበረው ማይክ ታይሰን ይህ በ20 ዓመታት ውስጥ ለመጀመሪያ ጊዜ ያደረገው ፕሮፌሽናል ፍልሚያ ነው፡፡ ወደ ቀለበቱ እንደገና ይመለስ እንደሆነ ሲጠየቅ ቁርጥ ያለ ምላሽ አልሰጠም።  ... የአሜሪካ ድምፅ 4 d ⟶
እስራኤል ደቡባዊ ቤሩትን በአየር ደበደበች  Public Domain  — የእስራኤል ጦር ሃይል ነዋሪዎች ከአካባቢው ለቀው እንዲወጡ ካስጠነቀቀ ትንሽ ቆይታ በኋላ በሊባኖስ ዋና ከተማ ቤሩት ደቡባዊ ክፍል ፍንዳታ ሲከሰት የሚያሳዩ የተንቀሳቃሽ ምስሎች ወጥተዋል፡፡ የሂዝቦላ ታጣቂ ዋና ይዞታ እንደሆነ በሚነገርለት በዚህ አካባቢ እስራኤል ከማክሰኞ እለት ጀምሮ ተደጋጋሚ ጥቃት እያደረሰች ይገኛል፡፡ ጥቃቱ ከመፈጸሙ ጥቂት ቀደም ብሎ የእስራኤል ወታደራዊ ቃል አቀባይ አቪሻይ አድራኢ በሃሬት ህሪክ አካባቢ የሚኖሩ ነዋሪዎችን ለቀው እንዲወጡ በ X የማህበራዊ የትስስር ገጻቸው ጥረ አስተላልፈው ነበር፡፡ የሊባኖስ መንግስት ብሄራዊ የዜና ወኪል (ኤን ኤን ኤ) በበኩሉ "ጠላት" ሲል በገለጻት እስራኤል በሃሬት ሂሪክ አቅራቢያ የደረሰውን ጨምሮ ሶስት የአየር ጥቃቶች ደርሰዋል ብሏል፡፡ እስራኤል በደቡባዊ ቤይሩት ላይ ተደጋጋሚ የአየር ድብደባ መፈጸሟን ተከትሎ በርካታ ንፁሀን ዜጎች ከአካባቢው እንዲሰደዱ አድርጓቸዋል፡፡ ሂዝቦላ በበኩሉ በሰሜናዊ እስራኤል የሚገኘው የእግረኛ ጦር ሻለቃ ዋና መሥሪያ ቤት ላይ ያነጣጠረ ሁለት የሮኬት ጥቃቶችን ሌሊት ላይ ማድረሱን ገልጿል። የሊባኖስ ባለስልጣናት ሂዝቦላ እና እስራኤል የተኩስ ልውውጥ ከጀመሩበት ካለፈው አመት ጥቅምት ጀምሮ ከ3,440 በላይ ሰዎች ተገድለዋል ሲሉ አስታውቀዋል፡፡ ይህ በእንዲህ እንዳለ የሊባኖስ መንግስት መገናኛ ብዙሃን የእስራኤል የምድር ጦር ሃይሎች በሊባኖስ ውጊያ ከጀመሩ ከስድስት ሳምንታት በኋላ ወደ ሊባኖስ ጠልቀው መግባታቸውንና ከሂዝቦላህ ታጣቂዎች ጋር ከፍተኛ ውጊያ ካደረጉ በኋላ እንዳፈገፈጉ ዘግበዋል። ሪፖርቶቹ ዛሬ ጥዋት የእስራኤል ወታደሮች በደቡብ ሊባኖስ በምትገኘው ቻማ መንደር በእስራኤል ድንበር አቅራቢያ የሚገኝ ስትራቴጂካዊ ኮረብታ መያዛቸውንና ቆይተው መልቀቃቸውን አስታውቀዋል፡፡ የእስራኤል የጦር አውሮፕላኖች የቤይሩትን ደቡባዊ ሰፈሮች እና ሌሎች አካባቢዎችን እየደበደቡ ባሉበት በአሁኑ ወቅትም የሊባኖስ እና የሂዝቦላህ ባለስልጣናት ጦርነቱን ለማቆም በዩናይትድ ስቴትስ የቀረበውን ረቂቅ ሀሳብ እያጤኑት ነው ተብሏል፡፡ ... የአሜሪካ ድምፅ 4 d ⟶
በህንድ በሆስፒታል በተነሳ እሳት አስር ህጻናት ሞቱ  Public Domain  — በሰሜናዊ ህንድ በሚገኝ ሆስፒታል ውስጥ በአራስ ሕፃናት ከፍተኛ እንክብካቤ ክፍል ውስጥ በደረሰ የእሳት አደጋ አስር አዲስ የተወለዱ ሕፃናትን ሲሞቱ 16 ሌሎች ደግሞ ቆስለዋል ሲሉ ባለስልጣናት አስታውቀዋል፡፡  አርብ አመሻሽ ላይ በህንድ ኡታር ፕራዴሽ ግዛት በጃንሲ ከተማ በሚገኝ ሆስፒታል ውስጥየእሳት አደጋው በተከሰተበት ወቅት 55 ጨቅላ ህጻናት ህክምና እየተደረገላቸው ነበር ተብሏል፡፡  የእሳት አደጋ መከላከል ባለሙያዎችም አደጋው ከተከሰተ ከሰላሳ ደቂቃ በኋላ የህይወት ማዳን ስራ መጀመራቸውንና ይህም የህይወት አድኑን ጥረት አዘግይቶታል ሲሉ የአይን እማኞች ተናግረዋል፡፡  በህንድ ውስጥ የእሳት ቃጠሎ የተለመደ መሆኑን የገለጸው የአሶሽየትድ ፕረስ ዘገባ የግንባታ ህጎች እና የደህንነት ደንቦች ብዙ ጊዜ በቤት ገንቢዎች እና በነዋሪዎች ይጣሳሉ ብሏል፡፡. ይህም በሀገሪቱ ካለው ደካማ የጥገና ስርዓት እና የእሳት አደጋ መከላከያ መሳሪያዎች እጥረት ጋር ተዳምሮ በእሳት አደጋ ለሚከሰት ሞት ምክንያት ስለመሆኑም ተገልጿል፡፡  ... የአሜሪካ ድምፅ 4 d ⟶
የቡድን 20 ሃገራት በአየር ንብረት ለውጥ ዙርያ ከስምምነት እንዲደረስ እርምጃ ሊወስዱ እንደሚገባ ተመድ አሳሰበ  Public Domain  — የተባበሩት መንግስታት የአየር ንብረት ሃላፊ ለታዳጊ ሃገራት በሚሰጠው የገንዘብ ድጋፍ ዙርያ በኮፕ 29 እየተደረጉ ያሉ ድርድሮች ገና ረጅም መንገድ እንደሚቀራቸው አስጠንቅቀዋል፡፡ በአዘርባጃን ባኩ እየተካሄደ ባለው የአየር ንብረት ለውጥ ጉባኤ ተደራዳሪዎቹ ልዩነታቸው በማጥበብ ከስምምነት ለመድረስ እየተነጋገሩ መሆኑ ተገልጿል፡፡ በቀጣዩ ሳምንት በጉባኤው ማጠናቀቂያ ላይ ከሚደረገው የሚንስትሮች ስብሰባ አስቀድሞ ከስምምነት ለመድረስ ፍላጎት ቢኖርም በዋና ዋና ጉዳዮች ግን አሁንም ከስምምነት መድርስ አልተቻለም ተብሏል፡፡ የተባበሩት መንግስታት የአየር ንብረት ሀላፊ ሲሞን ስቲል የዓለማችን ታላላቅ ኢኮኖሚዎች እና ከፍተኛ ብክለትን የሚያስከትሉ የቡድን 20 ሀገራት መሪዎች ሰኞ በብራዚል ሲገናኙ ለጉዳዩ ትኩረት እንዲሰጡት ተማጽነዋል። ለአለም አቀፍ የሙቀት አማቂ ጋዝ ልቀቶች ተጎጅ የሆኑት አንዳንድ ታዳጊ ሀገራት ከአየር ንብረት ተፅዕኖን ለመቋቋምና ወደ ታዳሽ ሃይል እንዲሸጋገሩ 1.3 ትሪሊዮን ዶላር ዓመታዊ ድጋፍ ጠይቀዋል፡፡ ይህ አሃዝም አሜሪካ፣ የአውሮፓ ህብረት እና ጃፓንን ጨምሮ ለጋሾች ከሚከፍሉት 10 እጥፍ በላይ ነው። ... የአሜሪካ ድምፅ 4 d ⟶
በዩናይትድ ስቴትስ የምርጫ ታሪክ ዳግም ወደ ዋይት ሃውስ ለመመለስ ዕድል ያገኙት ሁለተኛው ፕሬዝዳንት Public Domain  —  ባለፈው ማከኞው ምርጫ በከፍተኛ ድምጽ ማሸነፍ ብቻ ሳይሆን፤ የእንደራሴዎች ምክር ቤቱን ከእጁ ያስገባውን እና እስካሁን በተቆጠረውም ድምጽ የተወካዮች ምክር ቤቱን ውጤት በአብላጫ ድምጽ እየመራ ያለው የሪፐብሊካን ፓርቲ መሪ ያሁኑ ተመራጭ ፕሬዝዳንት ዶናልድ ትረምፕ የካቢኔ አባሎቻቸውንና ከፍተኛ አማካሪዎቻቸውን ከወዲሁ ይፋ ማድረግ ይዘዋል። ዳግም ወደ ዋይት ሃውስ የሚመለሱበትን ያልተጠበቀ ከፍተኛ ድምጽ ያገኙትን የቀድሞውን ፕሬዝዳንት ዶናልድ ትረምፕን ለዚህ ስኬት ያበቁት ምክኒያቶች የፖለቲካ አዋቂዎችን እና የሌሎችን ትኩረት በተመሳሳይ ስበዋል። በማናቸውም ሁኔታዎች በሙሉ ልባቸው ትራምፕን በመደገፍ ከሚታወቁት የፓርቲያቸው አጥባቂ ደጋፊዎች፤ ለሁለቱም ፓርቲዎች ወገንተኝነት እስከ ከሌላቸው መራጮች እና ብሎም በዲሞክራት ፓርቲ ደጋፊነታቸው እስከሚታወቁ በርካቶች ድረስ፤ በተመሳሳይ ድምጻቸውን ለትረምፕ ለመስጠት የወሰኑባቸው እነኚህ ሁኔታዎች፤ ያልጠበቁት የገጠማቸውን የተፎካካሪው ፓርቲ ደጋፊዎች ጨምሮ ብዙዎችን ለውይይት መጋበዛቸው አልቀረም። በጉዳዩ ላይ ማብራሪያ እንዲሰጡን የሕግ መምህሩንና የፖለቲካ ጉዳዮች ተንታኙን ዶ/ር ተሻገር ወርቁን አነጋግረናል። ሙሉ ዘገባውን ከተያያዘው ፋይል ይከታተሉ፡፡   ... የአሜሪካ ድምፅ 5 d ⟶
የቀድሞው የሶማሌላንድ ፕሬዝዳንት አህመድ ሲላንዮ አረፉ Public Domain  — የቀድሞው የሶማሌላንድ ፕሬዝዳንት አህመድ ሞሃመድ ሞሃሙድ ሲላንዮ ዛሬ አርብ በ88 ዓመታቸው ሃርጌሳ ውስጥ ማረፋቸውን የሶማሌላንድ ቴሌቭዥን አስታወቀ። እንደ አውሮፓውያን የዘመን አቆጣጠር በ2010 በከፍተኛ የሕዝብ ድምፅ ለአምስት አመት የስልጣን ዘመን የተመረጡት ሲላንዮ፤ የሥራ ዘመናቸው ለተከሉት ሁለት ዓመታት ከተራዘመ በኋላ፤ በአሁኑ ፕሬዝዳንት ሙሴ ቢሂ አብዲ እስከ ተተኩበት እንደ አውሮፓውያን የዘመን አቆጣጠር 2017 ድረስ አገልግለዋል። እንደ አውሮፓውያን የዘመን አቆጣጠር በ1982 የተመሰረተውን እና በኢትዮጵያ መንግስት ይደገፍ የነበረውን የሶማሌ ብሔራዊ ንቅናቄ የተቀላቀሉት ሲላንዮ የአማፂ ድርጅት መርተዋል። በመጀመሪያው የሶማሌላንድ ፕሬዝዳንት የቀድሞው አማጺ መሪ አብዲራህማን አሊ ቱር እስከተኩበት ጊዜ ድረስም አማጺ ቡድኑን ለበርካታ አመታት መርተዋል። ሲላንዮ የሶማሌላንድ ፕሬዝዳንት በነበሩበት ወቅት ከሶማሊያ ፌዴራል መንግስት መሪዎች ጋር ውይይት ጀምረው ነበር። ከአሁኑ ፕሬዝዳንት ሀሰን ሼክ ሞሀሙድ የመጀመሪያ የስልጣን ዘመን፤ እንደ አውሮፓውያን የዘመን አቆጣጠር 2014 አንስቶ በሁለቱ ወገኖች መካከል ተከታታይ ውይይቶች ቢካሄዱም፤ ጥረቶቹ በሙሉ ለስኬት ሳይበቁ ቀርተዋል። የሲላንዮ ዜና እረፍት የተሰማው ሶማሌላንድ አራተኛውን ፕሬዝዳንታዊ ምርጫ ካካሄደች ሁለት ቀናት በኋላ መሆኑ ነው። የህልፈታቸው መንስኤ ይፋ አልተደረገም። የቀድሞው የሶማሌላንድ መሪ የቀብር ሥነ ስርአታቸው ሰኞ እንደሚደሚፈጸም በዜና ዕረፍታቸው ተጠቅሷል። ... የአሜሪካ ድምፅ 5 d ⟶
ኢትዮጵያ በሶማሌላንድ የተካሄደውን ምርጫ አወደሰች Public Domain  — የኢትዮጵያ መንግስት በያዝነው ሳምንት ቦሶማሌላንድ የተካሄደውን ፕሬዝዳንታዊ ምርጫ አወደሰ። የኢትዮጵያ የውጭ ጉዳይ ሚኒስቴር በዛሬው ዕለት ባወጣው መግለጫ፤ “’ምርጫው በሰላማዊ እና ዲሞክራሲያዊ መንገድ’ በመካሄዱ ኢትዮጵያ የሶማሌላንድን ሕዝብ እንኳን ደስ አለህ ትላለች” ብሏል። መግለጫው በተጨማሪም “ነጻ እና ፍትሃዊ ምርጫ” በማካሄዱ ለሶማሌላንድን ብሄራዊ ምርጫ ኮሚሽን ያለውን አድናቆት ገልጧል። "ይህ ሂደት የሶማሌላንድን አስተዳደር እና ዲሞክራሲያዊ ስርዓት መጎልበት የሚያንፀባርቅ ነው" ሲልም አክሏል። የኢትዮጵያ እና የሶማሌላንድ ጠንካራ ግንኙነት ለዓመታት የዘለቀ ሲሆን፤ እየተገባደደ ባለው የአውሮፓውያኑ 2024 መጀመሪያ ላይ ኢትዮጵያን ከሶማሌላንድ 20 ኪሎ ሜትር የሚሸፍን የባህር ዳርቻ በሊዝ መከራየት የሚያስችል እና በምላሹ ለሶማሌላንድ ሉአላዊ እውቅና የሚያስገኝ የመግባቢያ ስምምነት መፈራረማቸውን የሃርጌሳ ባለስልጣናት ይፋ ማድረጋቸው ይታወሳል። ይሁንና ሶማሌላንድን የግዛቷ አካል አድርጋ የምትመለከተው ሶማሊያ ‘ሉዓላዊነቴን ጥሷል’ ስትል በሁለቱ እገኖች የተፈረመውን ስምምነት አውግዛለች። ሶማሌላንድ እና ኢትዮጵያ በበኩላቸው ስምምነቱን ‘ትክክለኛ ነው’ ሲሉ ይከላከላሉ። የሶማሌላንዱ የሰብአዊ መብት ተሟጋች እና የፖለቲካ ጉዳዮች ተንታኝ ጉሌይድ አህመድ ጃማ በሰጡት አስተያየት እንደጠቆሙት፤ የወቅቱ የሶማሌላንድ ፕሬዝዳንት ሙሴ ቢሂ አብዲ በምርጫው ካሸነፉ የመግባቢያ ሰነዱን ተግባራዊ ያደርጋሉ። ቅሬታ እንዳላቸው የገለጡ ተቃዋሚ ቡድኖችም በበኩላቸው ስምምነቱን መቀበላቸው ተመልክቷል። ... የአሜሪካ ድምፅ 5 d ⟶
ትረምፕ የደህንነት ተቋማትን እንዲመሩ የረጅም ጊዜ ደጋፊዎቻቸውን አጭተዋል Public Domain  —  ተመራጩ ፕሬዝደንት ዶናልድ ትረምፕ የአሜሪካ ማዕከላዊ የምርመራ ቢሮ (ሲአይኤ) እንዲመሩ ያጩት፣ የረጅም ጊዜ አጋራቸውና ደጋፊያቸው የነበሩ ግለሰብን ነው። የአሜሪካ የደህንነት ተቋማትን እንዲመሩ ያጩት ደግሞ የመንግሥት ሥልጣን ልምድ የሌላቸውንና፣ ተቋማቱን ሊያምሱ ይችላሉ ተብሎ የሚሰጉ ግለሰብን ነው። የቪኦኤ የብሔራዊ ደህንነት ዘጋቢ ጀፍ ሰልዲን ያጠናቀረውን ዘገባ ከተያያዘው ፋይል ይከታተሉ። ... የአሜሪካ ድምፅ 5 d ⟶
ናይጄሪያውያን በዋጋ ንረት ሳቢያ ባገለገሉ እቃ መሸጫ ሱቆች መገበያየት ይፈልጋሉ       Public Domain  —  ናይጄሪያውያን የዋጋ ንረት ባየለበት ሀገራቸው የፈጠራ ችሎታቸውን እየተጠቀሙ ነው። ያገለገሉ እቃዎችን የሚሸጡ እና - በሀገሬው ዘንድ "ኦክሪካ" እየተባሉ የሚጠሩ ሱቆች ቁጥር እያደገ ነው፣ እነዚህ ሱቆች ተመጣጣኝ አማራጮችን ያቀርባሉ፣ ከአቡጃ ጊብሰን ኢመካ እነዚህ የገበያ ስፍራዎች ናይጄሪያ ውስጥ ለብዙዎች እንዴት የኑሮ ህልውና መሠረት እንደሆኑ ተመልክቷል። ዝርዝሩን ከተያያዘው ፋይል ይከታተሉ። ... የአሜሪካ ድምፅ 5 d ⟶
"ኢላን መስክ ሉዓላዊነታችንን ሊያከብሩ ይገባል" የጣሊያን ፕሬዝደንት Public Domain  —  ጣሊያን ወደ ሀገሯ የሚጓዙ ፍልሰተኞች ውሳኔ እስከሚሰጣቸው አልቤኒያ በሚገኙ የእስር ካምፖች ለማቆየት ያወጣችው እቅድ የሕጋዊነት ጉዳይ መሰናክል አጋጥሞታል። ሮም ላይ ጉዳዩን የተመለከቱት ዳኞች ጉዳዩን ወደ አውሮፓ ሕብረት ፍርድ ቤት መርተውታል። አህጉራዊው ችሎት ውሳኔውን ለመስጠት ወራት ወይም ዓመታት ሊወስድ እንደሚችል ጠቅሶ ሄንሪ ሪጅዌል ከለንደን ያጠናቀረውን ዘገባ ከተያያዘው ፋይል ይከታተሉ። ... የአሜሪካ ድምፅ 5 d ⟶
የቀድሞ የኢትዮጵያ ፕሬዝዳንት ሳሕለ ወርቅ ዘውዴ በበጎ ፈቃድ በተሰባሰቡ ሴቶች ተመሰገኑ Public Domain  —  በበጎ ፈቃድ በተሰባሰቡ ሴቶች ጉዳይ ላይ በሚሠሩ ሀገር በቀል መሪዎች ዛሬ በምስጋና የተሸኙት የቀድሞ የኢትዮጵያ ሴት ፕሬዝዳንት ሣኅለወርቅ ዘውዴ፣ ሴቶችን የማብቃት ጅምር ተጠናክሮ እንዲቀጥል ጠየቁ። በሴቶች የተጀመሩ ሥራዎች ድጋፍ ሊደረግባቸው እንደሚገባ ተናግረዋል። ፕሬዝዳንቷ በንግግራቸው በሴቶች ላይ ካተኮሩ ንግግሮች ውጭ የሰጡት አስተያየት የለም። የአሜሪካ ድምፅ ያነጋገራቸው የዝግጅቱ ታዳሚዎች፤ በመንግሥት በኩል ተገቢውን አሸኛኘት ስላልተሰጣቸው ቅር እንደተሰኙ ተናግረዋል። ዝርዝሩን ከተያያዘው ፋይል ይከታተሉ። ... የአሜሪካ ድምፅ 5 d ⟶
ብሊንከን በእስያ ፓስፊክ የምጣኔ ሃብት ትብብር ጉባኤ ከታይዋኑ ልዑክ ጋር ተወያዩ Public Domain  — የዩናይትድ ስቴትስ የውጭ ጉዳይ ሚንስትር አንተኒ ብሊንከን ሊማ ፔሩ ላይ እየተካሄደ ካለው በአገራቱ የምጣኔ ሃብት ትብብር የመሪዎች ጉባኤ አስቀድሞ በትላንትናው ዕለት ነው፤ ከታይዋኑ ልዑክ ጋር ተገናኝተው የተነጋገሩት። ብሊንከን በማህበራዊ ሚዲያ ገጻቸው ላይ ባሰፈሩት ጽሁፍ እንዳመለከቱት ውይይቱ የኢኮኖሚ ትብብሮችን በሚመለከቱ ጉዳዮች ላይ ያተኮረ ነው። ሊማ ላይ ሊን ሂሲን-ኢ ጋር ተገናኝተን እያደገ ስለመጣው ኢኮኖሚያዊ ግንኙነታችን፤ እንዲሁም ግልጽ፣ ተለዋዋጭ እና ሰላማዊ የሆነ የኢንዶ-ፓሲፊክ ትብብር ለመፍጠር ያለን ዘላቂ የጋራ ቁርጠኝት ተነጋግረናል ብለዋል። ከጉባኤው መድረክ ትይዩ የተካሄደው እና ለ20 ደቂቃዎች የዘለቀው ውይይታቸው ቀደም ሲል በብሊንከን የኦፊሴል ሥራ መርሃ ግብር ላይ ያልተገለጸ መሆኑም ተጠቁሟል። ... የአሜሪካ ድምፅ 5 d ⟶
የጣሊያን ፕሬዝዳንት ኢላን መስክ የአገራቸውን ሉዓላዊነት እንዲያከብሩ አሳሰቡ Public Domain  — ጣሊያን ፍልሰተኞችን አልባኒያ ውስጥ ወደሚገኙ የስደተኞች ማቆያ ማዕከሎች ለመላክ የያዘችው አወዛጋቢ እቅድ በዚህ ሳምንት አንድ የሮም ፍርድ ቤት የድርጊቱን ህጋዊነት አስመልክቶ ማብራሪያ ለመጠየቅ ወደ የአውሮፓ ሕብረት ችሎት መምራቱን ተከትሎ፤ ፈተና ገጥሞታል። የአውሮፓ ሕብረት ዳኞች በጉዳዩ ላይ ብይን እስኪሰጡ ድረስም ወራት ወይም አመታት ሊወስድ መቻሉ ተመልክቷል። የፍልሰተኞችን ጉዳይ የሚመለከተው የሮሙ ልዩ ችሎት ዳኞች የጣሊያን መንግስት ወደዚያች አገር የሚጎርፈውን ፍልሰተኛ አልባኒያ ውስጥ ወደሚገኙ የስደተኞች ማቆያዎች ለመላክ ፍቃድ እንዲሰጠው ለችሎቱ ባቀረበው ጥያቄ ላይ ብይን ለመስጠት ባለመፍቀዱ ነው ሉክሰምበርግ ወደሚገኘው የአውሮፓ ህብረት ፍርድ ቤት ጉዳዩን የመራው። የፍርድ ቤቱን ውሳኔ ተከትሎም የጣሊያኑን ፍርድ ቤት ዳኞች ውሳኔ በመተቸት በኤክስ ማሕበራዊ መልዕክት መላላኪያ ገጻቸው ላይ ያሰፈሩት አሜሪካዊው ቢሊየነር ኤላን መስክ ከጣሊያኑ ፕሬዝዳንት ጋር እሰጥ አገባ ውስጥ ገብተዋል። ጣሊያን ወደ ድንበሯ የሚያቀኑትን እና ከባሕር የምትታደጋቸውን ፍልሰተኞች በቀጥታ ወደ አልባኒያው ማቆያ ማእከላት ለማጓጓዝ የወሰነችው የጥገኝነት ጥያቄዎቻቸውን ለመከታተል እና የጥገኝነት ጥያቄያቸው ውድቅ የተደረገባቸውን በዚያው ፍጥነት ወደ ትውልድ ሀገራቸው ለመመለስ በማቀድ ነው። በዚህም መሰረት አልባኒያ ውስጥ ሁለት የስደተኞች ማቆያ ማዕከላት የገነባችው ጣሊያን በሚቀጥሉት አምስት አመታት ውስጥ ለምታካሂደው ሥራም ከ650 ሚሊየን ዶላር በላይ ያስወታጣል ተብሎ ተገምቷል። የጣሊያን የድንበር ዞኖች ተብለው የተሰየሙት ሁለቱ ማዕከሎች የሚተዳደሩት በጣሊያን ባለስልጣናት መሆኑም ታውቋል። ... የአሜሪካ ድምፅ 5 d ⟶
Load More